SSS-4: jańa stantsııa elordany 2035 jylǵa deıin sýmen qamtamasyz etedi
ASTANA. KAZINFORM — Astana qalasynyń ákimi Jeńis Qasymbek áleýmettik jelidegi paraqshasynda elordany sýmen qamtý máselesi qalaı sheshiletini týraly jazdy.
— Elorda turǵyndarynyń jyl saıynǵy ósimin eskere otyryp, tirshilikti qamtamasyz etý nysandarynyń qýatyn josparly ári kezeń-kezeńimen arttyrý jumysyn júrgizip jatyrmyz. Biz qazirdiń ózinde gaz jylý stantsııalarynyń (GJS) qurylysy esebinen qalanyń jylý qýatyn ulǵaıttyq. Bul óz kezeginde jańa nysandardy paıdalanýǵa berýge múmkindik jasaıdy. Sol sııaqty jańa GJS, qosalqy elektr stantsııalary salynýda, olardyń arasynda qoldanystaǵy nysandar da jańǵyrtylyp jatyr.
Ózderińiz biletindeı, 2023 jyldyń kókteminde sý máselesi boldy. Sol jyly jazda jańa sý qubyry men úshinshi sorǵy-súzgi stantsııasy (SSS-3) iske qosyldy. Qazirgi ýaqytta qalada qýat tapshylyǵy joq. Budan bólek, aldaǵy jyldarǵa arnalǵan qor da bar, — dep jazdy qala basshysy.
Jeńis Qasymbek Hýseın ben Talal kóshesinen Syǵanaq kóshesine deıingi sý qubyryn tuıyqtaý jobasy ázirlenip jatqanyn aıtap ótti.
— Astanany qosymsha turaqty sýmen qamtamasyz etý úshin «Telman» sorǵy stantsııasynda tehnıkalyq sý qubyryn salý jobasyn júzege asyryp jatyrmyz. Tehnıkalyq sý qubyrynyń ekinshi jelisin salý arqyly «Telman» birinshi kóterý sorǵy stantsııasy táýligine 160 myń m³ jobalyq qýatyna tolyqtaı shyǵady.
Sonymen qatar, Nura jerasty sý ornynda sý qubyryn salý jobasyn ázirledik.
Budan bólek, uzaqmerzimdi sharalar aıasynda Q.Sátbaev atyndaǵy arnadan jańa sý qubyry men tórtinshi sorǵy-súzgi stantsııasyn (SSS-4) salýdy bastadyq. Sý alý nysanynyń ónimdiligi — táýligine 342 myń m³. SSS-4 qýaty — táýligine 210 myń m³. Atalǵan jobany iske asyrý 2035 jylǵa deıin halyqty taza aýyz sýmen qamtamasyz etýge qajetti qýat beredi.
Sondaı-aq, Hýseın ben Talal kóshesinen Syǵanaq kóshesine deıingi sý qubyryn tuıyqtaý jobasy ázirlenip jatyr. Bul joba Turan dańǵylynyń batysyndaǵy aýdandy sýmen qamtamasyz etedi. Jobalaý jumysy 2025 jyldyń jeltoqsanynda aıaqtalady dep josparlanyp otyr, — dep jazdy Jeńis Qasymbek.
Aıta ketelik Astanada jyldamdyǵy 10 Gbıt/s kabeldik ınternet synaqtan ótkizilip jatyr.