SSJ100 ushaǵyn satyp alý týraly kelisimder joq - Komıtet

NUR-SULTAN. QazAqparat – Qazaqstandaǵy áýekompanııalar SSJ100 áýe kemelerin satyp alyp jatqan joq. Bul týraly Azamattyq avıatsııa komıteti Telegram paraqshasynda jazdy, dep habarlaıdy QazAqparat tilshisi.

«Qazirgi ýaqytta buqaralyq aqparat quraldarynda qazaqstandyq áýekompanııalardyń SSJ100 áýe kemelerin satyp alýy týraly aqparat taralýda. Mundaı kelissózder memlekettik organdar deńgeıinde júrgizilmegenin atap ótemiz.  Sonymen birge, otandyq áýekompanııalar parki negizinen batys elderinde óndirilgen áýe kemelerinen turady», - delingen Komıtet málimetinde.

Osy oraıda komıtet búginde  otandyq tasymaldaýshylardyń parkin jańartý josparynda osy úlgidegi áýe kemeleri qarastyrylmaǵanyn naqtylady.

«Qolda bar aqparatqa sáıkes, qazaqstandyq áýekompanııalardyń reseılik tarappen SSJ100 áýe kemelerin satyp alý týraly kelisimderi joq. Aıta ketý kerek, negizgi reseılik áýekompanııalardyń áýe kemeleri parki negizinen batysta óndirilgen ushaqtardan turady», - dep atalyp ótti habarlamada.

Budan buryn habarlanǵandaı, QR Indýstrııa jáne ınfraqurylymdyq damý mınıstrliginiń basshylyǵy bıyl mamyr aıynda «Sukhoi Superjet 100» ushaqtary turaqty reısterde paıdalanylmaıtynyn aıtqan bolatyn.