«Səs Azərbaycan» baıqaýyna qatysqan ánshi Sanat Asýat Atyraýǵa oraldy

ATYRAÝ. KAZINFORM – Atyraýlyq jas ánshi Sanat Asýat «Səs Azərbaycan» halyqaralyq baıqaýynda 3-orynǵa ıe boldy. Atyraýlyqtar jas ánshini jyly shyraımen kútip aldy. 

Atyraý oblystyq mádenıet jáne tilderdi jamytý basqarmasynyń aqparatyna súıensek, Sanat Asýat T.Júrgenov atyndaǵy Ulttyq óner akademııasynyń «Estradalyq vokal» mamandyǵynyń 3-kýrsynda oqıdy. Ol jaqynda «Səs Azərbaycan» halyqaralyq baıqaýyna qatysyp, jartylaı fınalyna shyqqan edi.

– Halyqaralyq baıqaýdyń kórmeı tyńdaý kezeńinde jas ánshi álemge áıgili Ýıtnı Hıýstonnyń «Run to You» ánin sheber oryndaǵan bolatyn. Ol osy ánmen kórermender men qazylar alqasynyń nazaryn aýdardy. Baıqaýdyń kelesi kezeńinde Sanat Asýat ázerbaıjandyq Anna Kasıanovamen dýet quryp, «Clean Bandit» tobynyń «Symphony» ánin oryndady. Eki ánshi sahnada úılesimdilik pen kásibı sheberlikti kórsetti. Olardyń tálimgeri, Eurovision jeńimpazy Eldar Gasymov dýettiń ónerin joǵary baǵalady, - dep habarlady basqarmadan.

Sanat Asýattyń aıtýynsha, baýyolas eldegi halyqralaqy baıqaý jaı joba emes.

– «Səs Azərbaycan» baıqaýy meniń ómirimniń mańyzdy bóligi jáne sońy emes ekenin bilemin. Bul – meniń júregimnen oryn alǵan, janymmen sezingen ónerdegi jolymnyń bastaýy ǵana, - deıdi Sanat Asýat.

Eske sala ketelik, budan buryn Qazaqstan ánshisi «Ázerbaıjan daýysy» shoýynyń jartylaı fınalyna shyqqany týraly jazǵan edik.