Spýtnıktik sýretterden Irannyń ıadrolyq nysandary aımaǵynda belsendilik baıqaldy
ASTANA. KAZINFORM — Spýtnıktik sýretter Iranda 2025 jyly Izraıl men AQSh tarapynan shabýylǵa ushyraǵan Natanz jáne Isfahan qalalaryndaǵy ıadrolyq nysandarda belgili bir qurylys jumystary júrgizilip jatqanyn kórsetip otyr.
Amerıkalyq Planet Labs PBC kompanııasy usynǵan spýtnıktik sýretterde Isfahan men Natanzdaǵy zaqymdanǵan ǵımarattardyń ústine shatyrlar salynyp jatqany baıqalady.
Sýretterge sáıkes, ótken jyldyń jeltoqsan aıynda Natanzdaǵy zaqymdanǵan ıadrolyq nysanda shatyr turǵyzý jumystary bastalǵan. Alaıda nysannyń elektr júıesi áli de zaqymdanǵan kúıinde qalyp otyr.
Natanzdaǵy nysandy qorshap turǵan qorshaýdan ońtústikke qaraı birneshe júz metr qashyqtyqta ornalasqan aýmaqta 2023 jyldan beri jer qazý jumystary jalǵasyp keledi, al shyǵarylǵan topyraq úıindisiniń kólemi birtindep ulǵaıyp otyrǵany baıqalady.
Spýtnıktik beıneler Isfahandaǵy ıadrolyq nysanda da Natanzdaǵyǵa uqsas shatyr salynǵanyn, sondaı-aq nysanǵa jaqyn taýǵa aparatyn eki týnneldiń topyraqpen kómilip tastalǵanyn kórsetedi. Al úshinshi týnneldiń kireberisinde qabyrǵalardyń jańa qatary turǵyzylǵan.
Bul qurylys jumystary Izraıl men AQSh-tyń shabýyldarynan keıin Irannyń zaqymdanǵan ıadrolyq nysandarynda spýtnıkter arqyly tirkelgen alǵashqy belsendi áreketter bolyp otyr. Alaıda Iran bıligi bul eki nysanda júrgizilip jatqan jumystar týraly ázirge eshqandaı resmı málimdeme jasaǵan joq.
Sondaı-aq Halyqaralyq atom energııasy agenttigi (MAGATE) de bul máselege qatysty ázirge eshqandaı málimdeme taratpady.
Eske sala ketsek, byltyr maýsym aıynda AQSh Irannyń ıadrolyq nysandaryna soqqy jasady. Al prezıdent Tramp operatsııany sátti dep baǵalady.