Spýtnıktik tehnologııalardy damytý úshin salyq salasy ońtaılandyrylady

NUR-SULTAN. QazAqparat – Qazaqstanda naryqqa spýtnıktik tehnologııalardy tartý úshin salyq salasyndaǵy retteý ońtaılandyrylmaq. Bul týraly Digital Bridge halyqaralyq tehnologııalyq forýmynda QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Málik Oljabekov aıtty, dep habarlaıdy QazAqparat tilshisi.

«Qazirgi kezde qajetti zańnamalyq jaǵdaı jasaý úshin naryqty salyq salasyndaǵy retteýde ońtaılandyrý baǵytynda jumys istep jatyrmyz. Osy oraıda Qazaqstan naryǵyna baılanystyń zamanaýı tehnologııalaryn kirgizýge ekpin qoıylady», - dedi M. Oljabekov.

Onyń aıtýynsha, Qazaqstanda atalǵan salada sońǵy býyndy júıe ázirlenip jatyr. Qazirgi kezde tıisti jumystar keń jolaqty spýnıktik stantsııalardy legalızatsııalaýǵa qatysty bolyp tur.

Vıtse-mınıstr Qazaqstanda 600-den astam aýyl zamanaýı telekommýnıkatsııalyq tehnologııalarmen qamtylmaǵannyn aıtqan edi.

Sondyqtan spýtnıktik baılanys sheshimderi osy aýyldardyń aýmaǵyn qamtýǵa múmkindik beredi.

Buryn habarlanǵandaı, elordada úshinshi ret Digital Bridge halyqaralyq tehnologııalyq forýmy 28-29 qazan aralyǵynda ótip jatyr.

Bıylǵy forýmnyń taqyryby - Digital Era Lifestyle. Onda QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Tsıfrlandyrý, ınnovatsııa jáne ǵylym arqyly tehnologııalyq serpilis» ulttyq jobasyn usyndy.