Spýtnıktik sandyq teleradıo taratylym jelisiniń qamtý aýmaǵy 100 paıyzdy quraıdy - A.Jumaǵalıev
ASTANA. 18 qańtar. QazAqparat /Marlan Jıembaı/ - Búgin iske qosylǵan spýtnıktik sandyq teleradıo taratylym jelisiniń qamtý aýmaǵy 100 paıyzdy quraıdy.
Bul týraly búgin jelini iske qosý barysynda QR Baılanys jáne aqparat mınıstri Asqar Jumaǵalıev aıtty.
«Qazir osy spýtnıktik sandyq telearnanyń paıda bolýynyń arqasynda eldiń barlyǵy otandyq arnalardy kóre alady. Biz bul jelini qazirgi ýaqytta álemniń barlyq elderine júzege asyrylyp jatqan eń zamanaýı jańa DVB-S2 spýtnıktik jeli standarty negizinde qurdyq», - dedi mınıstr.
Mınıstrdiń atap ótýinshe, el azamattary telearnalardy spýtnıktik sandyq teleradıo taratylym jelisi arqyly tamashalaýy úshin arnaıy qural-jabdyqtar satyp alýlary qajet. «Bundaı quraldyń baǵasy 22 myń teńgege deıin. Qymbat emes, sonymen qatar biz ákimdiktermen áleýmettik jaǵynan az qamtylǵan turǵyndar úshin atalǵan quraldardy satyp almaq bolyp sheshtik», - dedi ol.
A.Jumaǵalıevtiń aıtýynsha, mınıstrlik pen barlyq oblys ákimdikteri arasynda jergilikti bıliktiń áleýmettik jaǵynan az qamtylǵan turǵyndardy spýtnıktik quraldarmen qamtamasyz etýin mindetteıtin memorandýmǵa qol qoıylǵan.
