Spýtnıktik qarǵybaý kıikterdiń qozǵalysyn baqylaýǵa múmkindik beredi
ASTANA. QazAqparat - Qazaqstannyń bıoalýandyqty saqtaý qaýymdastyǵy Kaspıı qubyrlary konsortsıýmnyń qoldaýymen bir aı boıy Aqtóbe, Mańǵystaý jáne Batys Qazaqstan oblystary aýmaǵyndaǵy oral jáne ústirt popýlıatsııasyndaǵy aqbókenderdi ustap, spýtnıktik qarǵybaý taǵýmen aınalysady, dep habarlaıdy QazAqparat.
Búgin qaýymdastyq Aqmola oblysynyń Qorǵaljyń aýdanyna arnaıy baspasóz-týryn uıymdastyryp, onyń barysynda aqbókenderdi ustaý jáne qarǵybaý taǵý protsesin kórsetedi. Qaýymdastyq málimetinshe, aqbókenderge «Globalstar» jáne «Iridium» spýtnıktiń júıesine jalǵanǵan, Sirtrack/Lotek modeldi taratqyshy bar 30 jańa qarǵybaý taǵý josparlanǵan. Atalǵan qarǵybaýlar 2-2,5 jyldan keıin ózdiginen túsip qalady jáne odan keıin ony qaıta paıdalanýǵa bolady. Munan bólek, Iridium Collar G5C 175E (Solar Assist - Sirtrack) jumys isteý úshin energııanyń bir bóligin kún panelinen alatyn álemdegi birinshi qarǵybaý sanalady.
Alystan baqylaýdaǵy negizgi maqsat - aqbókenderniń qozǵalysyn zertteý, sonymen qatar kıikterdiń oral jáne ústirt popýlıatsııalarynyń taralýynyń erekshe baqylanatyn tabıǵı aýmaǵyn tıimdi kúzetýdi kúsheıtý. Aqbókenderge qarǵy baý taǵýmen qatar olardń aýrýlaryn zerdeleý jumystaryn jalǵastyrý úshin arnaıy qan synamasy da alynady.
Qazaqstanda aqbókenderge spýtnıktik qarǵybaý taǵý 2009 jyldan beri júrgizilýde. Osy ýaqyttyń ishinde aqbókenderdiń barlyq úsh popýlıatsııasyna 117 habar taratqysh taǵyldy. Qazirgi ýaqytta 6 qarǵybaýdan belgi túsip otyrady.
