«Spýtnık V» vaktsınasyn júkti áıelderge qoldaný nusqaýlyǵy jarııalandy

MÁSKEÝ. TASS-QazAqparat - «Spýtnık V» koronavırýsqa qarsy vaktsınasyn júkti áıelderge preparattyń ana úshin kútiletin paıdasy ishtegi nárestege yqtımal qaýipten joǵary bolǵan jaǵdaıda ǵana qoldaný kerek. Preparatqa arnalǵan jańartylǵan nusqaýlyqta osylaı delingen, dep habarlaıdy QazAqparat TASS-qa silteme jasap.

«Júktilik kezinde «Gam-kovıd-vak « preparatyn klınıkalyq qoldanýdyń tájirıbesi joq. Janýarlarda reprodýktıvtik ýyttylyqty zertteý barysynda júktiliktiń ótýine, embrıofetaldyq damýyna (analyqtarda) jáne uryqtyń prenataldyq damýyna teris áseri anyqtalǵan joq. Osyǵan baılanysty júktilik kezinde «Gam-kovıd-vak« preparatyn kútiletin paıda yqtımal qaýipten joǵary bolǵan jaǵdaıda ǵana qoldaný kerek», - delingen qujatta.

Alaıda, emizý kezinde «Spýtnık V» ekpesin saldyrýǵa bolmaıtyny aıtylǵan. Reseı Federatsııasynyń Densaýlyq saqtaý mınıstri Mıhaıl Mýrashkonyń sózinshe, vaktsınanyń qaýipsizdigin klınıkaǵa deıingi zertteýlerdiń oń nátıjelerin, sondaı-aq tirkeýden keıingi zertteýler kezinde preparattyń tıimdiligi men qaýipsizdigi týraly derekterdi eskere otyryp, sarapshylar júkti áıelderge «Gam-kovıd-vak» vaktsınasyn qoldanýǵa qarsy kórsetkishterdi alyp tastaý týraly sheshim qabyldaǵan. Mınıstr: «Osylaısha koronavırýs ınfektsııasynyń aýyr aǵymynyń qaýpi joǵary júkti áıelderdi vaktsınalaý múmkindigi ashyldy», - dedi.