«Spýtnık V» vaktsınasyn saqtaý úshin Qazaqstan emhanalary termobokstar satyp alady
«Gam-Kovıd-Vak» («Spýtnık V») koronavırýsqa qarsy vektorlyq vaktsınany Reseıdiń N. F.Gamaleıa atyndaǵy epıdemıologııa jáne mıkrobıologııa ulttyq zertteý ortalyǵy ázirledi. Qaraǵandy farmatsevtıkalyq kesheni osy vaktsınany shyǵaratyn alań retinde tańdaldy. Búgingi tańda logıstıka máselesi sheshilýde, óıtkeni «Spýtnık V» vaktsınasynyń basty ereksheligi – ampýlalardy -20 gradýs temperatýrada saqtaý kerek.
«Óndiris tehnologııasynyń ereksheligi – ónimdi shuǵyl muzdatý qajettiliginde. Temperatýra men ýaqyttyń belgili bir kestesi bar. Aldymen flakon 0 gradýsqa deıin salqyndatylady. Sodan keıin -35 gardýspen jeldetkishter arqyly jyldam muzdatylady, ol bir saǵat ishinde qatyp qalýy tıis. Sodan keıin biz olardy qoraptarǵa salyp, tońazytqysh kameralarǵa salamyz», - dep túsindirdi «Qaraǵandy farmatsevtıkalyq kesheni» JShS bas dırektory Sergeı Baron.
Osy maqsatta qaraǵandylyq kompanııa arnaıy óndiristik tońazytqyshtardy satyp alǵan.
Búgingi tańda QR Densaýlyq saqtaý mınıstrligi vaktsınany medıtsınalyq mekemelerge jetkizý máselesin oılastyrýda.
«Memleket basshylary atalǵan vaktsınany QR-da shyǵarý týraly ýaǵdalasqan kezde Densaýlyq saqtaý mınıstriniń birinshi orynbasary bastaǵan jumys toby quryldy. Qazirgi ýaqytta biz osy máselelerdiń barlyǵyn áli de pysyqtap jatyrmyz. Rekordty qysqa merzimde tájirıbeli serııanyń jumysy jolǵa qoıyldy. Al qazir vaktsınany tómen temperatýrada saqtaý kerektigin eskere otyryp, saqtaý jáne logıstıka máseleleri pysyqtalýda. Aıta ketý kerek, bizde biryńǵaı dıstrıbıýtor bar, olardyń habtarynda tońazytqysh qondyrǵylary bar. Al egý kabınetterine deıin jetkizý máselesin óńirler men qalalardyń Densaýlyq saqtaý basqarmalary sheshedi. Vaktsınalardy saqtaý úshin termobokstar satyp alý múmkindigi qarastyrylýda», - dep túsindirdi QR DSM Medıtsınalyq jáne farmatsevtıkalyq baqylaý komıteti tóraǵasynyń orynbasary Nurlybek Asylbekov.