«Spýtnık V» vaktsınasyn ázirleýshilerdiń biri qazaqstandyq oqýshylarmen kezdesti

ShYMKENT. QazAqparat - Koronavırýsqa qarsy «Spýtnık V» vaktsınasyn ázirleýshilerdiń biri, bıologııa ǵylymdarynyń kandıdaty Іlııas Esmaǵambetov Shymkenttegi fızıka-matematıka baǵytyndaǵy Nazarbaev Zııatkerlik mektebiniń oqýshylarymen jáne ustazdarymen kezdesti, dep habarlaıdy QazAqparat.

Іlııas Esmaǵambetov – bıotehnolog, molekýlıarlyq bıolog, Reseıdegi N. F. Gamaleıa atyndaǵy epıdemıologııa jáne mıkrobıologııa ulttyq zertteý ortalyǵynyń qymetkeri, koronavırýsqa qarsy álemde alǵash tirkelgen vaktsınany ázirleýshiler qatarynda.

«Ǵylym udaıy damýdy qajet etedi: jańa ádisterdi ıgerý, ádebıetterdi oqý», – dedi jas ǵalym onlaın-kezdesýde.

NZM baspasóz qyzmetiniń málimetinshe, bıolog sondaı-aq vaktsınanyń aǵzaǵa áseri týraly aıtyp berdi.

«Ádette, ekpeniń birinshi komponenti engizilgennen keıin 38° deıin temperatýranyń kóterilýi, deneniń aýyrsynýy, bas aýrýy múmkin. Bul – resmı aqparat jáne qupııa bolǵan da emes. Budan bólek eshqandaı eleýli belgiler baıqalǵan emes, menińshe, aldaǵy ýaqytta da bolmaıdy», – dep jaýap berdi Іlııas Esmaǵambetov kópshilikti tolǵandyrǵan suraqqa.

«Egilý qajet pe, joq pa?» degen búginginiń basty saýalynyń da jaýaby berildi. Ǵalymnyń aıtýynsha, bul – árbir adam ózi jeke qabyldaıtyn sheshim. Degenmen, vaktsınatsııanyń basty mindeti adamdy arashalaý ǵana emes, aýrýdyń ózgelerge taralýyn boldyrmaý ekendigin atap ótti.