«Spýtnık-V» vaktsınasy transgendi adamdardyń jańa túrin jasaıdy» - aqparat feık
NUR-SULTAN. QazAqparat - Qazaqstandyqtar COVID-19-ǵa qarsy «Spýtnık-V» vaktsınasy adam genomyn ózgertýge qabiletti ekendigi týraly aıtylǵan vıdeony talqylaýda. Onda reseılik telejúrgizýshi Marııa Shýkshına men professor Pavel Vorobev osyndaı qorytyndyǵa keledi. Bul – ǵylymǵa qarsy.
Áıgili reseılik kınoaktrısa jáne telejúrgizýshi Marııa Shýkshına COVID-19 týraly buǵan deıin de birneshe ret jalǵan aqparat taratqan edi. Ol «vaktsına áýlıelerdiń bolashaqqa jasaǵan boljamynda aıtylyp ketkenin» alǵa tartyp, ekpe jasatpaıtynyn aıtty. Sondaı-aq pandemııa – bul «Reseı Federatsııasyna qarsy jarııalanǵan soǵys» dep málimdegen.
Professor Pavel Vorobev te KVI pandemııasy joq, al aýrý – «jergilikti indet» dep birneshe ret daýly oılaryn ortaǵa salǵan bolatyn.
Qazaqstandyqtar áleýmettik jelide bir-birimen bólisip jatqan vıdeoda aktrısa men professor COVID-19-ǵa qarsy reseılik «Spýtnık-V» vaktsınasyn talqylaýda. Vorobev óz sózinde preparattyń áser etý mehanızmin sıpattaıdy, sodan keıin onyń adam genomyn ózgertý qabiletine ıe bolýy múmkindigin aıtady.
Stopfake.kz saıtynyń jazýynsha, shyn máninde, bul vaktsınanyń mundaı qasıetteri joq jáne bolýy múmkin emes.
««Spýtnık-V» – adenovırýstyq vektor negizinde ázirlengen preparat. Ony jasaý úshin mRNQ nemese DNQ platformalary qoldanylmaǵan.
Adenovırýstyq vaktsınalar jańa shyqqan dúnıe emes. Buǵan deıin «Spýtnık-V» ázirleýshileri osy tehnologııany qoldana otyryp, Ebola bezgegine qarsy preparat jasaǵan.
Mundaı vaktsınalardyń jumys isteý prıntsıpi Sputnikvaccine.com resmı saıtynda egjeı-tegjeıli sıpattalǵan.
Sonymen qatar, «Spýtnık-V» preparaty klınıkaǵa deıingi jáne klınıkalyq synaqtardan sátti ótip, qaýipsizdik pen tıimdiliktiń joǵary deńgeılerin kórsetti. Vaktsına synalǵan janýarlarda da, ony qabyldaǵan eriktilerde de genomdyq ózgerister tirkelgen joq», - delingen stopfake.kz saıtynda.
Aıta keteıik, buǵan deıin ınternette matrıtsalyq RNQ negizinde jasalǵandyqtan Pfizer jáne Moderna vaktsınalary adamnyń DNQ ózgerte alatyndyǵy týraly jalǵan aqparat keńinen taraǵan bolatyn. Mamandar men faktchekerler bul qaýesetterdi joqqa shyǵardy .
