«Spýtnık-V» vaktsınasy nelikten qaýipsiz – maman pikiri
NUR-SULTAN. QazAqparat – S.Asfendııarov atyndaǵy Qazaq ulttyq medıtsına ýnıversıteti balalar juqpaly aýrýlary kafedrasynyń professory Lázzat Eralıeva aqpan aıynda bastalatyn koronavırýsqa qarsy vaktsınatsııanyń qaýipsizdigine qatysty pikirimen bólisti, dep habarlaıdy QazAqparat tilshisi.
«Koronavırýs ınfektsııasyna qarsy vaktsına kez kelgen ózge vaktsına sııaqty ımmýnobıologııalyq preparat ekendigin túsiný qajet. Onyń ózindik kórsetilimderi men qarsy kórsetilimderi bolady, sonymen qatar aǵzaǵa egilgennen keıin qandaı da reaktsııasy oryn alýy da múmkin. Aǵzaǵa vaktsına egilgen kezde antıdene paıda bolady. Antıdeneniń paıda bolýy belgili bir reaktsııamen qatar júrýi yqtımal. Adamdarda ımmýndyq qarsylyq ártúrli júrýi múmkin. Kóp jaǵdaıda reaktsııa bolmaıdy, bári qalypty ótip, adam erkin júre beredi jáne jumysyn jalǵastyra alady. Al keıbir ımmýndyq qarsylyq kezinde dene qyzýy kóterilip, vaktsına salynǵan jer qyzarýy nemese isýi yqtımal. Biraq, bul da qalypty dúnıe jáne aǵzanyń áreket etkendigin jáne antıdene bóle bastaǵanyn bildiredi», - dedi medıtsına ǵalymy.
Lázzat Eralıeva osy oraıda tańdaý nelikten Reseıde shyǵarylǵan Spýtnık-V vaktsınasyna túsip otyrǵandyǵyn túsindirip berýge tyrysty.
«Eger aqpan aıynan bastap qazaqstandyqtarǵa egiletin naqty «Spýtnık-V» vaktsınasyna qatysty aıtar bolsaq, qazirgi ýaqytta ol Reseıde shamamen 1,2 mln adamǵa egildi. Jáne de birde bir jaǵymsyz reaktsııa bolǵan emes. Mundaı reaktsııaǵa eń aldymen anafılaksııalyq reaktsııa jatady. Vırýstyq ınfektsııalardyń damý belgilerine uqsas kataraldy sımptomdar baıqalýy múmkin. Degenmen, bul da qalypty jaıt. Adamnyń birneshe kún boıy dene qyzýy kóterilgen nemese tumaýratqan, azdap basy aýyrǵan jaǵdaılar kezdesken. Alaıda munyń barlyǵy 3-4 kúnniń ishinde ótip ketedi», - dedi dáriger.
Onyń atap ótýinshe, koronavırýs ınfektsııasyn qarsy vaktsına alǵannan keıin spırttik ishimdik ishýge, saýnaǵa barýǵa, buryn dámin tatpaǵan azyq-túlikti jeýge bolmaıdy. Sonymen qatar júrekke salmaq túsirmeý úshin kúsh qoldanylatyn sport túrlerimen aınalyspaýǵa keńes beriledi.
