«Spýtnık-V» vaktsınasy nege tez ázirlendi – maman pikiri
NUR-SULTAN. QazAqparat – Medıtsına ǵylymdarynyń doktory, ımmýnolog, professor Pavel Derıabın «Spýtnık-V» vaktsınasynyń nege tez ázirlengenin túsindirdi, dep habarlaıdy QazAqparat tilshisi.
«Shynymdy aıtsam, bir jyl buryn pandemııa bastalǵan kezde, vaktsınalar budan da tezirek jasalady dep kútken edim. Sebebi búginde ǵalymdar buryn-sońdy bolmaǵan, eń zamanaýı tehnologııalarǵa ıe. Máselen, reseılik «Spýtnık-V» vektorlyq vaktsınasy alǵashqylardyń biri bolyp tez jasaldy dep aıtady. Nelikten? Sebebi bul vaktsına basqa vaktsınalardy jasaýda qoldanylǵan nárselerdiń negizinde jasalǵan. Atap aıtqanda, Ebola vırýsyna qarsy vaktsınalar. Bul aýyr ınfektsııa bizde de, Reseıde de taralǵan joq, ınfektsııanyń tasymaldaýshylary bolǵan joq. Tıisinshe, Ebolaǵa qarsy vaktsınany jappaı óndirý, adamdardy jappaı vaktsınalaý da qajet bolmady. Sonymen, vektorlyq vaktsına degenimiz ne? Bul lokomotıvy men qajetti jolaýshylar tıelgen vagondary bar parovoz sekildi. Bul parovoz baıaǵyda jasalǵan. Endi bul lokomotıvke «S aqýyzyn» túzetin genderi bar jańa vagon tirkelgen. «S aqýyzy» adam aǵzasynda paıda bolǵanda, oǵan qarsy antıdeneler bóline bastaıdy jáne ımmýndyq reaktsııa bastalady. Osylaısha, adam atalǵan vırýstyq ınfektsııadan qorǵalady. Sondyqtan vaktsınalar tez daıyn boldy», - dedi dáriger onlaın dáriste.
Onyń aıtýynsha, qazaqstandyq vaktsınalar da úırenshikti tehnologııalar boıynsha ázirlenýde. Munda tiri qozdyrǵysh hımııalyq zattardyń kómegimen «óltiriledi», biraq ımmýndyq reaktsııa týdyratyn qabileti ǵana saqtalady. Aýrýdy týdyratyn qabileti saqtalmaıdy.
Bıologııalyq qaýipsizdik máseleleri ulttyq ortalyǵynyń ǵalymdary tumaýǵa qarsy «óltirilgen» vaktsınalardy jasap kórgen jáne bul tájirıbe koronavırýsqa qarsy vaktsına alý kezinde qoldanyldy.
Professor koronavırýsqa qarsy vaktsınalardyń «joq jerden» jasalmaıtynyn jáne qazaqstandyq ǵalymdar jańa vaktsınalardy jasaýǵa daıyn ekenin atap ótti.
«Búginde koronavırýsqa qarsy vaktsınalar ártúrli tehnologııalar boıynsha ázirlenýde. Biraq eshqandaı vaktsına tıisti synaqtardan ótpeıinshe qoldanýǵa ruqsat berilmeıdi. Qazaqstanda qoldanylatyn vaktsınalarǵa kelsek, olarda teorııalyq turǵyda adam aǵzasyna teris áser etý múmkindigi joq. Onyń ústine vaktsınalar qaýipsizdik úshin muqııat tekseriledi», - dedi P. Derıabın.
