«Spýtnık V» vaktsınasy ımmýnıtetti qalyptastyrýǵa múmkindik beredi - maman
ALMATY. QazAqparat - Qazaqstanda koronavırýs ınfektsııasyna qarsy vaktsınany 1 aqpannan bastap egý josparlanyp otyr. Birinshi jartyjyldyqta 2 mln adamǵa vaktsına salynsa, ekinshi jartyjyldyqta bul kórsetkish eki esege artyp, 4 mln adamǵa jetedi. Bastapqy kezeńde reseılik «Spýtnık V» vaktsınasy qoldanylady. Atalǵan vaktsına qandaı, halyqty jappaı vaktsınatsııalaý qanshalyqty mańyzdy jáne bul týraly jetekshi ǵalymdar ne deıdi. Bul suraqtarǵa QazAqparat tilshisi jaýap izdep kórdi.
«Spýtnık V» - adenovırýs vektoryna negizdelgen vektorlyq vaktsına. Sondaı-aq, álemde alǵashqy bolyp tirkelgen vaktsına. Onyń tıimdiligi 91,4%. «Spýtnık V» vaktsınasynyń koronavırýs ınfektsııanyń aýyr jaǵdaılaryna qarsy tıimdiligi 100% quraıdy. Vaktsınany N.F Gamaleı atyndaǵy Ulttyq epıdemıologııa jáne mıkrobıologııa ǵylymı-zertteý ortalyǵy jasady. Ortalyq - óz salasy boıynsha álemdegi jetekshi ǵylymı-zertteý ınstıtýty.
Aldaǵy eki aptada «Spýtnık V» vaktsınasyna suranys artady. Qazirdiń ózinde «Spýtnık V» vaktsınasyn satyp alýǵa 50-den astam memleketten 1,2 mlrd dozaǵa ótinim qabyldandy.
Sondaı-aq, «Spýtnık V» vaktsınasy boıynsha halyqaralyq ǵylymı saraptamalyq keńes quryldy, onyń quramyna Argentına, Ulybrıtanııa, Germanııa, Úndistan, Reseı, AQSh, Frantsııa, Shvetsııa jáne Horvatııa elderiniń vırýsologııa, mıkrobıologııa, genetıka jáne bıotehnologııa salasyndaǵy eń myqty ǵalymdary kirdi. «Spýtnık V» keńesi ǵalymdarynyń aıtýynsha, uqsas platformadaǵy basqa preparattarmen salystyrǵanda reseılik vaktsınanyń nátıjeleri jaqsy.
«Spýtnık V» vaktsınatsııasynyń matrıtsalyq RNQ-nyń ınnovatsııalyq tehnologııasyn qoldaný arqyly jasalǵan Pfizer-BioNTech jáne Moderna vaktsınalarynan aıyrmashylyǵy, SARS-CoV-2 vırýsynyń genetıkalyq materıalyn (tikendi qabyq aqýyzy) adam jasýshalaryna jetkizý úshin kádimgi sýyq tııýdi týdyratyn adenovırýs tuqymdasynyń basqa vırýs qabyǵy qoldanylǵan kezde vektorlyq tehnologııany qoldanyp jasalǵan. Jasýshalar ımmýn reaktsııasyn týdyratyn aqýyz shyǵarady, solaısha organızm vırýspen kúresýdi úırenedi. Vaktsınada COVID-19 týdyratyn koronavırýs joq, sondyqtan vaktsınatsııadan keıin aýyryp qalý múmkin emes.
BUU Bas hatshysy COVID-19 pandemııasyna qarsy kúrestegi reseılik vaktsınaǵa joǵary baǵa berdi. Antonıý Gýterreshtiń pikirinshe, reseılik preparat pandemııamen kúreste mańyzdy ról atqara alady. Sonymen qatar, BUU mıssııalarynda qoldanýǵa bolatynyn jetkizdi. Ol úshin DDU sertıfıkatyna ıe bolýy kerek. Qazir ótinishti qaraýdyń ekinshi kezeńi júrip jatyr.
Bloomberg farmatsevtıka agenttiginiń aǵa taldaýshysy Sem Fazelı reseılik «Spýtnık V» vaktsınasy týraly maqalasynda vaktsına týraly málimetterdi zertteı otyryp, onyń tıimdiligine senimdi bolýǵa negiz bar ekenin atap ótti.
Vaktsınany ne úshin saldyrý kerek
Koronavırýs pandemııasyna qatysty jaǵdaı búkil álem boıynsha kúrdelene tústi. Qaýipti indet juqtyrǵandardyń sany 100 mln-ǵa jetti. 2 mln astam adam qaıtys boldy. KVI-diń jańa shtammy paıda boldy. Ǵalymdar vaktsınatsııa koronavırýs ınfektsııanyń kóbeıýin toqtatýǵa jáne epıdemıologııalyq jaǵdaıdy túzetýge kómektesetinin aıtady.
Dál qazir bul aýrýǵa qarsy dári joq. Naýqastarǵa sımptomatııalyq em júrgiziledi. Sondyqtan bar úmit vaktsınada.
Professor Kúlásh Qurmanova atap ótkendeı, Reseı men álemniń birneshe elderiniń turǵyndaryna koronavırýsqa qarsy vaktsınalar egilip jatyr. KVI-ge qarsy vaktsına qanaǵattanarlyq túrde tózimdi, eger vaktsınatsııa erejeleri saqtalsa, janama áserler óte sırek kezdesedi.
Sonymen qatar, ol bizdiń eldiń turǵyndaryna vaktsına egý qajet ekenin basa aıtty.
Reseıde «Spýtnık V» vaktsınatsııasyn jappaı egý 18 qańtarda bastaldy.
Qazaqstanda vaktsınatsııa 1 aqpanda bastalady. «Spýtnık V» eki rettik ınektsııa shemasy uzaq merzimdi ımmýnıtetti qalyptastyrýǵa múmkindik beredi. Vektorlyq vaktsınalardy qoldaný tájirıbesi ımmýnıtettiń eki jylǵa deıin saqtalatynyn kórsetedi.
Qazaqstanda koronavırýsqa qarsy «Spýtnık V» vaktsınasyn egýdiń birinshi kezeńi memleket esebinen júzege asyrylady. Qazirdiń ózinde Qaraǵandy farmatsevtıkalyq zaýytynda naryqqa vaktsınalar jetkizý kestesi jasalǵan.
Vaktsınany qoldaný jónindegi nusqaýlyqta qarsy kórsetkishterge mynalar jatady:
-vaktsınanyń kez kelgen komponentine joǵary sezimtaldyq;
- anamnezdegi aýyr allergııalyq reaktsııalar;
-ótkir ınfektsııalyq jáne ınfektsııalyq emes aýrýlar, sozylmaly aýrýlardyń órshýi;
-júktilik jáne emizý kezeńi;
- 18 jasqa deıin jáne 65 jastan joǵary (tıimdiligi men qaýipsizdigi týraly málimetterdiń bolmaýyna baılanysty);
Sondaı- aq, sozylmaly baýyr jáne búırek aýrýlary, endokrındik júıeniń aýyr buzylýlary (qant dıabeti), qan túzý júıesiniń aýyr aýrýlary, epılepsııa, ınsýlt jáne ortalyq júıke júıesiniń basqa aýrýlary, júrek-qan tamyrlary júıesi aýrýlary, birinshi jáne ekinshi ımmýn jetispeýshiligi, aýtoımmýn aýrýlary, ókpe aýrýlary jáne allergııalyq reaktsııalary bar adamdarǵa vaktsına ekkende muqııat bolý kerek.
