«Spýtnık V» vaktsınasy Ázerbaıjanǵa taıaýda jetkiziledi

BAKÝ. QazAqparat – Baký qalasyna aldaǵy ýaqytta «Spýtnık V» vaktsınasynyń 100 myńnan astam dozasy jetkiziledi, koronavırýsqa qarsy reseılik vaktsınany Ázerbaıjanda shyǵarý máselesi qarastyrylyp otyr. Bul týraly TMD Parlamentaralyq assambleıasynyń kóktemgi sessııasy alańynda Ázerbaıjan parlamentiniń spıkeri Sahıba Gafarovamen kezdesý kezinde Federatsııa Keńesiniń tóraıymy Valentına Matvıenko málim etti.

«Sáýir-mamyr aılarynda «Spýtnık V» vaktsınasynyń 100 myńnan astam dozasyn jetkizý kelisimi týraly bilemin, sebebi biz jappaı vaktsınalaýdyń pandemııany toqtatýdyń jalǵyz ádisi ekenin túsinip otyrmyz», - dedi ol.

Federatsııa keńesi spıkeri reseılik taraptyń preparattardy Ázerbaıjan Respýblıkasyna jetkizýden bólek, ony bul el aýmaǵynda shyǵarylýy da múmkin ekenin aıtty.

«Vaktsınany tek jetkizýge ǵana emes, meniń bilýimshe, bul vaktsınalardy Ázerbaıjanda shyǵarý máselesi de qarastyrylyp otyr. Bul óz kezeginde jappaı vaktsınalaýdy tezdetip, vaktsınany basqa elderge de eksporttaýǵa múmkindik berýi múmkin», - dep qosyp ótti V.Matvıenko.

Atap óteıik, 11 naýryzda Ázerbaıjan premer-mınıstrá Álı Asadov Reseıden atalǵan vaktsınanyń 300 myń dozasyn satyp alý týraly sheshimge qol qoıdy. Búginde Ázerbaıjanda ekpe saldyrtqandardyń jalpy sany 1,2 mln adamnan asqan. Sonyń ishinde vaktsınanyń alǵashqy dozasy 837 304 adamǵa, ekinshi dozasy – 434 487 patsıentke egildi.

Osy arada, Ázerbaıjanda kún saıyn COVID-19 vırýsyn juqtyrýdyń 2 myńnan astam oqıǵasy tirkelip otyrǵanyna qaramastan, sarapshylar aldaǵy ýaqytta eldegi epıdemııalyq jaǵdaıdyń turaqtalýyna senimdi.

Osylaısha, eldiń Aýmaqtyq medıtsınalyq bólimshelerin basqarý birlestigi basqarmasynyń janyndaǵy medıtsınalyq-ǵylymı komıtet basshysy (TƏBIB) Akıf Gýrbanov Ázerbaıjannyń búginde COVID-19 koronavırýsynyń úshinshi tolqynyn bastan ótkerip jatyr dep sanap otyr.

«Qazirgi kezde vırýs juqtyrǵan adamdar sany kúnsaıynǵy ósimi joq, tqraqtylyq baıqalyp otyr. Eger boljamymyz aqtalsa, jańa oqıǵalar sany birtindep azaıatyn bolady», - dedi TƏBİB ókili.

Bul rette A.Gýrbanov Ázerbaıjanda anyqtalǵan COVID-19 shtamdarynyń aýrýdy burynǵyǵa qaraǵanda odan da juqpaly etkenin, biraq aýrý belgileriniń ótkirligi men ólim-jitim oqıǵalaryna áser etpegenin atap ótti.

Avtory Serikbol Kóshmaǵanbetov