«Spýtnık V» óndirýshileri bizge jeńildik jasaıtyn boldy – Aleseı Tsoı

NUR-SULTAN. QazAqparat – Bir dozasy 9,4 dollar bolatyn QazVac vaktsınasy turǵanda 26 dollarlyq «Spýtnık V»-den nege bas tartpaımyz? Densaýlyq saqtaý mınıstri Alekseı Tsoı otandyq Youtube arnaǵa bergen suhbatynda osy jaıttyń mánin túsindirdi, dep habarlaıdy QazAqparat tilshisi.

«Ýájińizben kelisemin. QazVac erekshe óndiristik jaǵdaıdy qajet etetindikten, aıyna 50 myń doza ǵana alyp otyrmyz. Al bizge halyqtyń kóp bóligin neǵurlym jyldam vaktsınalaý kerek. Zaýyt iske qosylǵansha aıyna 50 myń doza salyp otyrsaq, kóp kútemiz. Bizge vaktsınalaý naýqanyn barynsha jyldam aıaqtaý kerek. Bul jerdegi másele osyǵan ǵana tirelip tur. Qazir biz úshin eń qundy nárse - ýaqyt. Árıne, kúte turyp, jyl sońynda ǵana bárine QazVac egýge bolady. Biraq qazir vakınalap bitirmesek, kúzde vırýstyń taǵy bir tolqyny keledi degen qaýip bar», - dedi mınıstr.

Alekseı Tsoı vırýstyń úshinshi tolqyny kelse, qaıtadan ekonomıka toqtaıtynyn aıtady.

«Dál qazir bárimiz vaktsına alyp, maskany sheshetin kúnge jetýimiz kerek. Búkil álem qazir meıilinshe kóp vaktsına alyp, halyqty qamtamasyz etýge kúsh salyp jatyr. Buǵan deıin Reseıden vaktsınanyń bir dozasyn 26 dollarǵa satyp alǵan bolatynbyz. «Spýtnık V»-diń taǵy 3 mln dozasyn satyp alý týraly kelisimshart bar. Biraq onyń baǵasy 21,9 dollar bolady. Biz jeńildik aldyq. Qalǵan kólem osy baǵamen ákelinedi», -dedi Alekseı Tsoı.