«Spýtnık V» aǵzanyń vırýsqa tolyqqandy ımmýndy qarsylyǵyn qalyptastyrady – A.Gıntsbýrg
MÁSKEÝ. QazAqparat – Koronavırýs ınfektsııasyna qarsy vaktsına uzaq ýaqyt boıy osy indetti juqtyrý qaýpin joıady.
Qazaqstandyq tilshilerge bergen suhbatynda Reseıdegi N.F.Gamaleıa atyndaǵy ulttyq epıdemıologııa jáne mıkrobıologııany zertteý ortalyǵynyń dırektory Aleksandr Gıntsbýrg osylaı dedi, - dep habarlaıdy «QazAqparat» HAA menshikti tilshisi.
Aleksandr Gıntsbýrgtyń aıtýynsha, «Spýtnık V» vaktsınasynyń jaǵymsyz áseri kóptegen eldegi ulttyq kúntizbede tizilgen basqa vaktsınalardyń jaǵymsyz áserinen esh erekshelenbeıtinin aıtady. Onyń bári de preparattyń nusqaýlyǵynda jazylǵan.
«Atap aıtqanda bul vaktsınany saldyrǵan adamnyń dene qyzýy bir jarym nemese eki kún boıy 38 gradýsqa deıin kóterilýi múmkin. Ine salynǵan jer de sonsha ýaqyt aýyrsynýy yqtımal. Bulshyq et pen bas aýyrady. Alaıda munyń bári de temperatýramen birge joǵalady. Eger adam vaktsınalaýdan keıin ózin jaısyz sezinse, ádettegideı bir tabletka paratsetamol qabyldap, tynyshtalýyna bolady. Mundaı jaǵymsyz áserdi jalpy vaktsına alǵandardyń 15-16 paıyzy sezinýi múmkin, qalǵan 85 paıyzy eshqandaı jaısyzdyqty sezinbeıdi», - dedi ortalyq dırektory.
Ol sonymen qatar N.F.Gamaleıa atyndaǵy ulttyq epıdemıologııa jáne mıkrobıologııany zertteý ortalyǵy koronavırýsqa qarsy vaktsınany 2020 jyly ázirlep qoıǵanyn atap ótti. Sonymen qatar antıdeneler týraly sóz qozǵaǵan Aleksandr Gıntsbýrg adam koronavırýspen aýyryp bolǵan jaǵdaı – vaktsınalaýdan keıingi jaǵdaıdan múlde bólek ekenin jetkizdi.
«Bul bir-birine múlde uqsamaıtyn jaǵdaılar. Adam koronavırýspen jeńil jaǵdaıda aýyrsa, dárigerge júginbeýi múmkin. Alaıda mundaıda onyń boıyndaǵy antıdeneler uzaqqa barmaıdy. Al adam koronavırýstyń aýyr túrin ótkerse, ókpesi ishinara zaqymdalyp, dene qyzýy kóterilse, onyń boıynda edáýir antıdene paıda bolady. Biraq keıingi zertteýler kórsetip otyrǵandaı, mundaı jaǵdaıdaǵy adamdardyń 15-16 paıyzynyń aǵzasynda antıdenemen birge ınterferon sekildi beloktar paıda bolatynyn kórsetip otyr. Al ınterferondar antıdenelerdi yǵystyrady. Sol sebepti indettiń aýyr túrin ótkergenderde uzaq merzimdi tinder paıda bolady deýge kelmeıdi. Álemdegi oqıǵalar adamdardyń koronavırýstyń aýyr túrin qaıta ótkerýi múmkin ekenin kórsetip otyr», - dedi ol.
Ol sonymen qatar «Spýtnık V» preparatyn 18-den 60 jasqa deıingi adamdarǵa egýge bolady. Alaıda qazirdiń ózinde vaktsına synaǵynan 80 jasqa deıingi egde adamdar da ótip jatyr.
Ǵalym sonymen birge ortalyqtyń mamandary antıdenelerdi týdyratyn ǵana emes, aǵzadaǵy vırýstardyń kóbeıýýine jol bermeıtin preparattardy da daıyndap jatqanyn atap ótti. Bul baǵyttaǵy jumys RF Densaýlyq saqtaý mınıstrliginiń memlekettik tapsyrmasynan keıin bastalady.
