«Spring Golden Eagle Festival»: Bıyl Baıan-Ólgeıden 22 búrkitshi qatysady
Dástúrge aınalǵan aıtýly sharaǵa qatysatyn búrkitshiler Ulanbatyrǵa Baıan-Ólgııden ushaqpen jetkiziledi. Uıymdastyrýǵa qajetti 20 mln-ǵa tarta tógróg (teńgege shaqqanda shamamen 2.7 mln. ) qarajatty jergilikti bılik bóletin boldy. Bıyl 11 - ret qatarynan ótkizilgeli otyrǵan «Búrkitshiler toıyn» Mońǵolııa Tabıǵı orta jáne týrızım mınıstrligi, Baıan-Ólgeı aımaǵynyńAımaq Ákimi is basqarmasy, Ulanbatyr qalasynyń Tabıǵı orta, týrızm basqarmasy, Mońǵolııa Búrkitshiler qaýymdastyǵy sekildi uıymdar birlesip uıymdastyrmaqshy. Atalmysh merekelik sharanyń maqsaty, elimizge keletin týrıster sanyn arttyrý, mońǵol elin jáne Mońǵolııa qazaqtarynyń búrkitpen ań aýlaý mádenıetin nasıhattaý bolyp tabylady.
Al uıymdastyrýshylar alqasynan, Mońǵolııa qusbegiler qaýymdastyǵynyń tóraǵasy, tarıh ǵylymdarynyń doktory Edilhan Qonysbaıulynan bıylǵy «Búrkitshiler toıynyń» ereksheligi jaıly suraǵan edik.
«Mońǵolııa úkimeti týrızım salasyn damytý maqsatynda, jyl saıyn naýryzdyń 3-5-i kúnderi keıbir aımaqtarda kóshpendilerdiń turmys tirshiligin, mádenıetin pash etetin festıvaldar uıymdastyrady. Mysaly, Hóvsgól aımaǵynda sarlyq «Qodas» sıyrdyń, Ómnógov aımaǵynda Túıe jarysy festıvalin, Ulanbatyr qalasynda búrkitshiler toıyn ótkizedi. Bıylǵy jyly «Kóshpendiler - 2018» sharasy aıasynda ótetin atalmysh festıval eki kúnge jalǵasady. Jylda bir kún toılanatyn. Bıyl halyqtyń tilegi boıynsha ári «Búrkitshiler toıyn» tamashalaýshylardyń sanynyń artýyna baılanysty osyndaı sheshimge keldik», - deıdi Edilhan Qonysbaıuly.
Onyń sózinshe, saıysqa qatysatyn 22 búrkitshiniń eń úlkeni 80 jastaǵy - Báteı aqsaqal, eń jasy 14 jastaǵy - Áıgerim. Sonymen qatar, bıyl búrkitshiler quramasynyń sapynda 3 qyz bala óner kórsetedi, olar: Aısholpan, Gúlǵaıym, Áıgerimder. Al saıys barysynda búrkit shaqyrý, shyrǵaǵa tartý, búrkitshilerdiń ábzelderi men jabdyqtaryn synaltý qarastyrylǵan. Budan bólek, kókpar tartý, teńge ilý qatarly ulttyq oıyndar jurt úshin uıymdastyrylady.
Esterińizge sala keteıik, «Búrkitshiler toıy» jyl saıyn naýryzda Ulanbatyr qalasynda, al qazan aıynda Baıan-Ólgıı aımaǵynda resmı túrde toılanady. Byltyrǵy jyly sharany jergilikti turǵyndar men sheteldikterdi qosa alǵanda 20 myńǵa jýyq azamattar tamashalaǵan bolatyn.
Arnaıy «QazAqparat» HAA úshin Baıan-Ólgeıden
Qýat Ýathan
