SPOT jáne KEDEN: EAEO shekarasynda saýdany jeńildetetin tsıfrlyq sheshimder

Mınıstrdiń aıtýynsha, búginde EAEO-ǵa múshe elderdiń keden qyzmeti aldynda turǵan basty mindet — shekara beketteri arqyly taýar ótkizýdiń ashyqtyǵy men jedeldigin qamtamasyz etý.

— Búginde kedendik operatsııalardyń ashyq júrgizilýin qamtamasyz etý asa mańyzdy. Ásirese, ótkizý beketterindegi rásimderdiń aıqyn ári jedel bolýy úshinshi eldermen ekonomıkalyq baılanysty damytýǵa jáne syrtqy saýda operatsııalaryn boljamdy etýge múmkindik beredi, — dedi Sergeı Shklıaev.

Onyń aıtýynsha, EAEO-ǵa múshe memleketter shekaradaǵy úderisterdi avtomattandyrýǵa arnalǵan tsıfrlyq sheshimderdi belsendi túrde engizip keledi. Mınıstr mysal retinde Qazaqstanda iske qosylǵan KEDEN aqparattyq júıesin atady.

Atalǵan júıe elektrondy kezekti brondaý, aldyn ala aqparat berý, elektrondy tranzıttik deklaratsııa rásimdeý jáne ruqsat qujattaryn tsıfrlyq formatta óńdeý qyzmetterin biriktiredi. Sonyń nátıjesinde kedendik rásimderden ótý ýaqyty aıtarlyqtaı qysqarǵan.

Sergeı Shklıaev Reseıdiń bul baǵyttaǵy tájirıbesine de toqtaldy. Onyń sózinshe, elde kedendik operatsııalardy 10 mınýtqa deıin qysqartý mindeti qoıylǵan. Osy maqsatta kólik nómirin avtomatty taný, onlaın ólsheý jáne júk tıelgen kólikterdi toqtatpaı skanerleý tehnologııalary kezeń-kezeńimen engizilip jatyr.

— Kólik ótkizý beketinde toqtamaıdy. Qozǵalys kezinde nómiri oqylyp, salmaǵy ólshenip, júk skanerlenedi. Keıin bul málimetter aldyn ala usynylǵan aqparatpen salystyrylady, — dedi mınıstr.

Onyń aıtýynsha, mundaı júıe adal kásipkerlerge shekaradan «jasyl dáliz» arqyly artyq tekserýsiz ótýge múmkindik beredi.

Mınıstr sondaı-aq EAEO elderindegi tsıfrlandyrý deńgeıine toqtaldy. Onyń sózinshe, qazir Eýrazııalyq ekonomıkalyq komıssııa keden organdaryna arnalǵan biryńǵaı talaptar men erejelerdi ázirlep jatyr.

— Bizdiń basty maqsatymyz — Keden odaǵy aýmaǵyndaǵy syrtqy ekonomıkalyq qyzmetke qatysýshylar úshin ortaq ári túsinikti erejeler qalyptastyrý, — dedi Sergeı Shklıaev.

Sonymen qatar ol barlyq elge ortaq biryńǵaı baǵdarlama engizý josparlanyp otyrmaǵanyn aıtty. Ár memleket óz tsıfrlyq platformasyn derbes damytady. Alaıda kedendik talaptar men jumys tásilderi birizdendirilýi qajet.

Suhbat barysynda Reseıde 1 maýsymnan bastap iske qosylatyn SPOT júıesi týraly da sóz boldy. Bul — EAEO elderinen ımporttalatyn taýarlardyń jetkizilýin aldyn ala rastaýǵa arnalǵan tsıfrlyq mehanızm.

Shklıaevtyń aıtýynsha, SPOT jańa kedendik baqylaý túri emes. Júıe júk tasymalyna qatysty málimetterdi avtomatty túrde salystyryp, aqparattyń sáıkestigin tekserýge múmkindik beredi.

— Taýar alýshy aldyn ala jetkizilim týraly qujatty júıege engizip, QR-kod alady. Ótkizý beketinde bul málimetter taýar-kólik júkqujatymen avtomatty túrde salystyrylady, — dedi ol.

Eger málimetter sáıkes kelse, kólik qosymsha tekserýsiz ári kidirissiz ótedi.

Mınıstrdiń aıtýynsha, bıznes ókilderi arasynda SPOT júıesine qatysty alańdaýshylyq bar. Bul, negizinen, tsıfrlyq servısterdiń jumysy men jańa talaptarǵa beıimdelý máselesine baılanysty. Degenmen Reseıdiń memlekettik organdary táýlik boıy tehnıkalyq qoldaý kórsetip, jedel jeli qyzmetin iske qosqan.

— Ótkizý beketterinde qoldan bıýrokratııalyq kedergiler jasalmaıdy, — dep atap ótti EEK ókili.

Sonymen qatar Sergeı Shklıaev SPOT júıesi eń aldymen «sur ımportpen» kúresýge jáne adal bıznes úshin teń básekelestik orta qalyptastyrýǵa baǵyttalǵanyn aıtty.

— Zań talaptaryn saqtaıtyn kásipkerler úshin málimetti elektrondy túrde jiberip, QR-kod alý qıyndyq týdyrmaıdy. Al mundaıEýrazııalyq ekonomıkalyq odaq tetikter jalǵan qujattarmen nemese tirkelmegen uıymdar arqyly jetkiziletin taýarlardyń jolyn kesýge múmkindik beredi, — dedi mınıstr.

Onyń pikirinshe, EAEO elderindegi keden salasyn odan ári tsıfrlandyrý saýda úderisterin jedeldetip, júk tasymalynyń ashyqtyǵyn arttyrady. Sondaı-aq bızneske túsetin ákimshilik júktemeni azaıtýǵa yqpal etedi.

Aıta keteıik, búgin Qazaqstan men Reseı Prezıdentteri eki el halyqtary dostyǵynyń jeti negizi týraly málimdemege qol qoıady.