Sportzaldyń qulaýynan 10 adam qaza tapty, taǵy 14 adamnyń taǵdyry beımálim
ASTANA. QazAqparat - Ońtústik Koreıanyń Kendjý qalasynda sportzal tóbesiniń opyrylyp qulaýy saldarynan 10 adam qaza taýyp, taǵy 14-iniń taǵdyry áli belgisiz bolyp otyr.
Bul týraly ITAR-TASS habarlady. Aıta keteıik, 565 stýdent oqýǵa túskenin atap ótip jatqan Pýsan shet tilder ýnıversıteti sportzalynyń tóbesi qalyń qardyń salmaǵyna shydamaı, opyrylyp túsken. Birer kún buryn eldiń shyǵys jaǵalaýyna kóp qar túsip, keıbir jerde qardyń qalyńdyǵy 1 metrge jetken bolatyn. Qaza bolǵan 10 adamnyń 9-y stýdent, bireýi keshti uıymdastyrýshy bolyp shyqty. Qutqarýshylar taǵy 3 stýdent pen 11 qyzmetshini izdestirýde.
«Bul tótenshe jaǵdaıdan barlyǵy 112 stýdent zardap shekti, olardyń 3-eýin áli taba almaı jatyrmyz. Olar úıindilerdiń astynda jatýy múmkin», - deıdi Kendjý polıtsııasynyń ókili.
Aıta ketý kerek, 17 adam aýyr jaralandy, al 84 adam jeńil jaraqattar aldy.
Júrgizilip jatqan qutqarý sharalaryna 400-den astam órt sóndirýshiler, polıtseıler men áskerıler qatysýda. Órt sóndirý mashınalary jáne basqa da tehnıka oqıǵa ornyna ázer jetti, óıtkeni kýrort taýdyń basynda ornalasqan jáne dúısenbi kúni keshke qalyń qar jaýǵan bolatyn.
Polıtsııa kesh bastalǵanǵa deıin ǵımarat shatyryndaǵy qardyń nelikten túsirilmegenin anyqtaýda.
Pýsan ýnıversıtetiniń prezıdenti Chýn He Lın JOO-nyń zardap shekkenderge kórsetiletin kómektiń barlyǵyn óz moınyna alatynyn málim etti.
