Sporttyq jekpe-jek jáne kúsh qoldanylatyn sport túrleri konfederatsııasy óz logotıpin tańdady
ASTANA. 15 sáýir. QazAqparat - Sporttyq jekpe-jek jáne kúsh qoldanylatyn sport túrleri konfederatsııasy óz logotıpin tańdady. Búgin Astanada ótken baspasóz máslıhatynda resmı logotıptiń tanystyrylymy ótti.
Eske sala keteıik, jyl basynda 21 qańtardan 21 aqpan aralyǵynda logotıpti jasaqtaýǵa baıqaý jarııalanyp, oǵan Qazaqstan, Reseı, Ýkraına, Bolgarııa, AQSh, Túrkııa, Izraıl jáne Qyrǵyzstan elderinen 300-den astam dızaınerler qatysty. Shamamen 900-den astam jumys kelip tústi.
Tańdalǵan logotıp, baıqaý jeńimpazy 21 jasar almatylyq Elnur Aqtaılaqovqa tıesili. Jeńimpaz Olımpıada chempıony Serik Sápıevtiń qolynan 500 myń teńge kóleminde syıaqy aldy.
Serik Sápıevtiń aıtýynsha, logotıp konfederatsııa rýhyn kórsetedi. Ol jerden Konfederatsııa quramyna enetin 5 sport túri bir shańyraq astynda jumylǵan obrazyn kórýge bolady. Sharaǵa qazaqstandyq sport juldyzdary Serik Sápıev, Maksım Rakov, Gýzel Manıýrova, Georgıı Tsýrtsýmııa jáne taǵy basqalary qatysty. Aıta keteıik, konfederatsııa quramyna Qazaqstannyń Boks, Dzıýdo, Grek-rım, erkin jáne áıelder kúresi, Aýyr atletıka, Taekvando federatsııalary engen.
