Sporttyq jekpe-jek konfederatsııasyna jańa basshy keldi
ASTANA. QazAqparat - Eldos Ramazanov Sporttyq jekpe-jek jáne kúsh qoldanylatyn sport túrleri konfederatsııasynyń bas dırektory bolyp taǵaıyndaldy. Buǵan deıingi dırektor Nurlan Nógerbek mamyr aıynda Qazaqstan Respýblıkasy Ulttyq Olımpıada komıtetiniń bas dırektory qyzmetine ketken bolatyn, dep habarlaıdy QazAqparat.
Aıta keteıik, bıylǵy jyldyń basynan beri Eldos Ramazanov Sporttyq jekpe-jek jáne kúsh qoldanylatyn sport túrleri konfederatsııasy basshysynyń keńesshisi qyzmetin atqarǵan bolatyn.
«Sporttyq jekpe-jek jáne kúsh qoldanylatyn sport túrleri konfederatsııasy birneshe jyldan beri elimizdegi sportty basqarý modeli jasaqtalǵan eń úzdik sporttyq uıym bolyp sanalady. Konfederatsııa quramyna jaqynda Olımpıada baǵdarlamasyna qosylǵan karate sporty da endi. Eldos Ramazanovtyń sportty basqarýdaǵy mol tájirıbesi uıymnyń jumysyna jańa lep berip, sport túrlerin damytý odan ári jalǵasady dep senemin», - dedi atalmysh konfederatsııa tóraǵasy Danııar Abýlǵazın.
Eske sala keteıik, Sporttyq jekpe-jek jáne kúsh qoldanylatyn sport túrleri konfederatsııasy Olımpıada baǵdarlamasyna enetin bes sport túrin damytýǵa basymdyq berý maqsatynda 2012 jyly quryldy. Konfederatsııa quramyna boks, grek-rım kúresi, erkin kúres pen erkin stıldegi áıelder kúresi, taekvondo jáne aýyr atletıka engen. Al 2015 jyldan bastap konfederatsııa quramyna ulttyq sport - qazaq kúresi engizildi. 2018 jyldyń mamyrynan bastap Qazaqstan karate odaǵy konfederatsııa múshesi atandy.
Eldos Ramazanov M. V. Lomonosov atyndaǵy Máskeý memlekettik ýnıversıtetin «ekonomıst» mamandyǵy boıynsha bitirgen (1993j.), sodan soń E.Bóketov atyndaǵy Qaraǵandy memlekettik ýnıversıtetinde zańger mamandyǵyn alǵan.
Ár jyldary kommertsııalyq qurylymdar men memlekettik kásiporyndarda basshylyq qyzmette bolǵan.
2004-2006 jyldary QR Mádenıet, aqparat jáne sport mınıstrligi ekonomıka jáne qarjy departamenti dırektorynyń orynbasary, keıin apparatynyń jetekshisi qyzmetterin atqarǵan.
2006-2007 jyldary KAZENERGY Qoǵamdyq qorynyń atqarýshy dırektory, keıin bas dırektordyń orynbasary; «Raýan Medıa Grýpp» AQ aqparattyq-saraptamalyq ortalyǵynyń dırektory; «KazTransGaz» AQ apparatynyń jetekshisi, «Jetisý» áleýmettik-kásipkerlik korporatsııasy UQ» AQ basqarma basshysynyń orynbasary, «Berkýt» qarjy-ónerkásip korporatsııasy bas dırektorynyń orynbasary, QR Saýda jáne óndiris palatasynyń vıtse-prezıdenti.
2011-2013 jyldary «Atameken Odaǵy» Qazaqstan Ulttyq ekonomıkalyq Palatasy basqarma basshysynyń orynbasary. 2013 jyldyń qyrkúıegi men 2015 jyldar aralyǵynda apparat jetekshisi, 2015 jyldan bastap basqarma múshesi, basqarma basshysynyń orynbasary qyzmetterinde boldy.
