Sporttyq keshenderdi tekserý qorytyndysy boıynsha Astana prokýratýrasy zań buzýshylyqty joıý týraly 8 usynys engizdi
ASTANA 14 qańtar. QazAqparat - QR Bas prokýratýrasynyń tapsyrmasyna sáıkes Astana qalasynyń prokýratýrasy qala aýmaǵynda ornalasqan sporttyq-saýyqtyrý keshenderiniń qyzmetterindegi zańdylyqtyń saqtalýy men tıimdilik máseleleri boıynsha tekserý ótkizdi.
Bul týraly Astana qalasy prokýratýrasynyń baspasóz qyzmeti habarlady.
Astana aýmaǵynda 25 sporttyq ǵımarat qyzmet etetini anyqtaldy. Onyń 3 vedomstvolyq bolǵandyqtan, 22 nysan ǵana qala turǵyndaryna dene shynyqtyrý jáne sportpen aınalysý úshin qyzmetterin usyna alady. Bul halyq sany jyl saıyn ósip kele jatqan elorda úshin árıne jetkiliksiz. Qazirgi jaǵdaıda bul sport nysandary bir mezgilde 9851 adamdy ǵana qabyldaı alady, ol turǵyndardyń jalpy sanynyń 1,2% quraıdy.
Tekserý nátıjesi sporttyq ǵımarattardyń laýazymdy tulǵalary jibergen birqatar zań buzýshylyqtardy anyqtap berdi.
Atap aıtqanda, kommýnaldyq menshik bolyp tabylatyn sporttyq ǵımarattardyń zańsyz jalǵa berilýi; paıdalanýǵa qabyldanbaǵan sporttyq nysandardy paıdalaný; nysandardy paıdalaný maqsatynan tys qoldaný; shtattyq bapkerler quramymen jınaqtalmaý; tıisti biliktiligi jáne bilimi joq ınstrýktorlarmen sporttyq jattyǵýlar ótkizý; jas shamasy tıisti jasqa tolmaǵan balalardy oqytý jáne basqa da zań buzýshylyqtar anyqtaldy.
Mysaly, «Dáýlet» sportkombınaty» MQKK Qazaqstan Respýblıkasynyń Týrızm jáne sport agenttigi tóraǵasynyń 15.07.2003 jylǵy № 06-2-2/214 buıryǵymen bekitilgen sport mektepterinde oqý-jattyǵýdy uıymdastyrý tártibi týraly reglamenttiń 9 t. buza otyryp, tennısten bastaýysh daıyndyq toptaryna balalardy jas mólsherine baılanysty shekteýlerge qaramastan qabyldaǵan. Atalǵan reglamentke sáıkes topqa qabyldaý 7-9 jastan bastalady.
Mysaly, MQKK dırektorynyń 24.09.2012 jylǵy № 02-05/47 buıryǵyna sáıkes bastaýysh daıyndyq tobyna shekti jas mólsherine jetpegen 2006 jyly týǵan Kýznetsova ıA. qabyldanǵan.
Sondaı-aq, MQKK dırektorynyń 15.10.2012 j. № 02-05/54 buıryǵyna sáıkes jasy jetpegen 220 balaǵa sporttyq jattyǵýlarǵa qatysýǵa ruqsat etý arqyly atalǵan Reglamenttiń 10 t. buzylýyna ákelgen.
«Alaý» muz saraıy» MQKK dopty hokkeı, shaıbaly hokkeı, short-trek boıynsha bastaýysh daıyndyq toptaryna balalardy shekti jas mólsherine qaramastan qabyldaýy arqyly Reglamenttiń 9 t. buzylǵan. Erejege sáıkes atalǵan toptarǵa balalardy qabyldaý 9-11 jastan bastalady.
Osylaısha, MQKK buıryqtaryna sáıkes shaıbaly hokkeıge 9 jasqa tolmaǵan 41, short-trekke - 3, mánerlep syrǵanaý tobyna 6 jasqa tolmaǵan 28 bala qabyldanǵan.
Sondaı-aq, sport nysandarynyń qaýipsizdik sharalarynyń tıisti túrde qamtamasyz etilmeýi faktileri anyqtaldy.
«Dene shynyqtyrý jáne sport týraly» Zańnyń 15-babyna sáıkes dene shynyqtyrý jáne sport sabaqtaryn ótkizý maqsatyndaǵy nysandar men ǵımarattardy paıdalaný sanıtarlyq jáne órt qaýipsizdiq erejelerine saı bolýy qajet.
Nysandardyń barlyǵynda derlik tehnıkalyq retteý jáne metrologııa, órt qaýipsizdigi jáne sanıtarlyq-epıdemıologııalyq normalardyń buzylǵandyǵy kezdesedi.
Máselen, sporttyq nysandar qyzmetkerleriniń medıtsınalyq kitapshalarynda saraptamadan ótkendigi týraly jalǵan belgi qoıylýy boıynsha 68 fakti anyqtaldy.
Sondaı-aq, sport nysandarynda 1700 birlikten astam senimsiz ólshem quraldarynyń (monometrler, ólshegishter) qoldanylýyna baılanysty «Ólshem birligin qamtamasyz etý týraly» Zańnyń 19-babynyń 1-tarmaǵynyń buzylǵandyǵy anyqtaldy.
Kórsetilgen barlyq zań buzýshylyqtar boıynsha Astana qalasynyń prokýratýrasy memlekettik organdarǵa zań buzýshylyqty joıý týraly 8 usynys engizip, qaraýǵa aldy.
