Sporttyq gımnastıkadan jasóspirimder arasyndaǵy Qazaqstan chempıondary anyqtaldy
ASTANA. QazAqparat - Almatyda senbi kúni sporttyq gımnastıkadan jasóspirimder arasynda Qazaqstan chempıonatynyń aqtyq syny óz máresine jetti, dep habarlaıdy QazAqparat aqparattyq-sporttyq HAB-qa silteme jasap.
Elimizdiń barlyq óńirlerinen kelgen 70 qyz ben 55 ul bir apta boıy júldeli oryndar men Qazaqstannyń úzdik gımnasty ataǵy úshin baq synady. Jasóspirim sport sheberleri arasynda almatylyq Erbol Jantyqov jeńimpaz atansa, almatylyq Ilfat Imardjanov kúmis júldeni, qostanaılyq Andreı Lýngýl qola júldeni ıelendi.
«Jarystan jaǵymdy áser aldym. Bul bizge iri, halyqaralyq oıyndarǵa qatysýǵa kómektesip, rýhymyzdy bıiktetedi. Qazir óz elimizde baq synadyq, bolashaqta jattyǵyp, odan ári damı túsemiz. Bizdiń qarsylastarymyz shymkenttik myqty sportshylar boldy. Biraq, biz negizinen óz aramyzda, ońtústik astana quramasynyń sportshylarymen jarysyp jatyrmyz», - dep bólisti sport sheberi, Almaty quramasynyń múshesi Erbol Jantyqov.
Sondaı-aq, uıymdastyrýshylar men bapkerler almatylyq jeńimpaz Narıman Qurbanovtyń úzdik nátıje kórsetkenin atap ótti. Bıyl ol álemdik elementter tirkelimine kirgen erekshe element jasady. Sondaı-aq, ol Álem kýbogy kezeńinde chempıon atandy.
Sporttyq gımnastıkadan Almaty federatsııasynyń vıtse-prezıdenti Mahmýd Eskendirov atap ótkendeı, jarysqa eń myqty gımnasttar qatysqan.
«Biz qala quramasyna úzdik sportshylardy jınap jatyrmyz. Chempıonattyń qorytyndysy boıynsha, ondaı úmitkerler bar deýge bolady», - dedi ol.
Jarystyń basty maqsaty - Almatyda sporttyq gımnastıkany damytý jáne dáripteý, sondaı-aq myqty sportshylardy anyqtaý, sportshylardyń tehnıkalyq-taktıkalyq sheberligin ósirý jáne salaýatty ómir saltyn nasıhattaý.
