Sporttyq áleýetke qol jetkizilýi elimizde buqaralyq sporttyń damý qarqynyn arttyrýǵa jáne bıik jetistikterge jetýge yqpal etetin bolady - Elbasy
ALMATY. 8 aqpan. QazAqparat - Almatyda Memleket basshysy Nursultan Nazarbaev 2011 jylǵy 7-qysqy Azııa oıyndaryna qatysýshylarmen - qazaqstandyq sportshylarmen kezdesti, dep habarlaıdy QR Prezıdentiniń baspasóz qyzmeti.
Memleket basshysy qysqy jetinshi Azııa oıyndarynyń jeńimpaz komandasyn quttyqtady.
- Komandalyq eseptegi jáne medaldar sany boıynsha mundaı jarqyn da úzdik jeńis bizde buǵan deıin eshqashan bolǵan emes. Bul qazaqstandyq sporttyń naǵyz saltanaty! Bul bizdiń elimizdiń saltanaty! Barsha elimiz bizdiń atletterimizge jankúıer boldy. Qazaqstandyqtarmen birge men de bizdiń sportshylarymyz úshin alańdadym. San ret shyrqalǵan memlekettik ánuranymyzdyń jeńisti áýenimen elimiz bolyp birge tolqydyq. Bizdiń bárimiz de jeńisti kúttik, úmitimiz aqtalyp, tabysqa qol jetkizdik, - dep atap ótti Prezıdent.
Azıada oıyndary Olımpadalyq oıyndardan keıingi ekinshi iri keshendi jarys bolyp tabylady. Buǵan deıin qysqy Azııa oıyndaryn uıymdastyrýdy tek ekonomıkasy qýatty úsh memleket: Japonııa, Qytaı jáne Ońtústik Koreıa ǵana qolǵa aldy. Endi olardyń qataryna Qazaqstan qosyldy. Azıadanyń qarsańynda kóptegen jańa biregeı sporttyq ǵımarattar salyndy. Qazaqstan kúlli álemge EQYU, ShYU, AÓSShK sammıtteri nemese din kóshbasshylary sezderi tárizdi iri halyqaralyq forýmdardy ótkize alatynyn ǵana emes, sondaı-aq qatysýshylary men sportshylary jaǵynan sany kóp joǵary halyqaralyq deńgeıdegi sporttyq oıyndardy da ótkize alatynyn kórsetti.
- Halyqaralyq Olımpıada komıtetiniń tóraǵasy Jak Roggemen kezdesý kezinde men 2022 jylǵy qysqy Olımpıada oıyndaryn Qazaqstanda ótkizý múmkindigin talqyladym. Azıadany tabysty ótkizgennen keıin jáne bizdiń iri jeńisimizden soń Qazaqstannyń múmkindigi arta túsedi dep senemin,- dep atap ótti Memleket basshysy.
Sheteldik qonaqtar Azıadanyń joǵary deńgeıde ótkenine, olarǵa jyly shyraıly qabyldaýlar men qonaqjaılyq kórsetilgenine, qyzmet kórsetý deńgeıi joǵary bolǵanyna jáne qazaqstandyqtardyń mádenıetine tańdanystaryn bildiristi. Olardyń esinde Azıadanyń Astanada ashylý jáne Almatydaǵy jabylý rásimderi jaqsy saqtalyp qalmaq.
- Bul eki qalany endi azııalyq qurlyqtaǵy jańa sporttyq astanalar, álemdik deńgeıdegi jarystar men qysty sport túri boıynsha jattyǵý jıyndaryn ótkizýdiń ortalyqtary dep ataýǵa quqymyz bar. Sporttyq áleýetke qol jetkizilýi elimizde buqaralyq sporttyń damý qarqynyn arttyrýǵa jáne bıik jetistikterge jetýge, Azıada jeńimpazdarynyń jeńisti jolyn laıyqty jalǵastyratyn, Qazaqstanda sportshylardyń jańa tolqynyn tárbıeleýge yqpal etetin bolady. Sizderdiń basty eńbekterińiz - osynda. Jeńiske jetýge baryn salǵan sportshylar, jattyqtyrýshylar, komandanyń barlyq mamandarynyń eńbegi zor. Sizderdiń barlyǵyńyzdy jetinshi qysqy Azııa oıyndaryndaǵy jeńispen taǵy da quttyqtaımyn! Mınıstr Dosmuhamedov bastaǵan Qazaqstannyń Týrızm jáne sport mınıstrliginiń qyzmetkerlerine, Astana men Almaty ákimderine óz alǵysymdy aıtamyn. Azıadaǵa qatysqan barlyq qazaqstandyqtardyń úlesin baǵalamaý múmkin emes. Bizdiń sportshylar jeńdi. Qazaqstan sporty jeńdi. Elimiz jeńdi. Rahmet sizderge! - dedi Memleket basshysy.
Qazaqstandyq sportshylar Memleket basshysyna Qazaqstanda úlken sportty belsendi damytqany, biregeı sporttyq nysandardyń qurylysy úshin, sondaı-aq rekordtar jasaýda jáne altyn medaldar jeńip alýda halyqaralyq sporttyq jarystarǵa qatysýǵa múmkindik týǵyzǵany úshin shyn júrekten alǵystaryn aıtty.
Qazaqstan Azıadanyń qorytyndysy boıynsha jalpy komandalyq esepte 32 altyn, 21 kúmis jáne 17 qola medal alyp, birinshi oryndy ıelendi.
