Sportty serik etken ulttyń ǵana urpaǵy saý bolady - Serik Ahmetov
ASTANA. 30 jeltoqsan. QazAqparat - Búgin Úkimet úıinde QR Premer-Mınıstri Serik Ahmetov ústimizdegi jyldyń jeltoqsanynda Italııanyń Trentıno qalasynda ótken XXVI Dúnıejúzilik qysqy Ýnıversıadadan oralǵan júldegerlerdi qabyldady.
Bul týraly Úkimet basshysynyń resmı saıtynan habarlady.
Kezdesýge altynnan alqa taqqan Tatıana Osıpova, Mark Starostın, Aleksandr Malyshev, kúmis medal ıegerleri Damır Ramazanov, Nursultan Belgibaev, qola júldeger Olga Mandrıka, sondaı-aq bapkerler quramy qatysty.
Premer-Mınıstr sportshylardy quttyqtap, olarǵa Alǵys hattar tapsyrdy.
«Memleket basshysy buqaralyq sport túrlerin damytýǵa aıryqsha mańyz beredi»,-dep atap ótti S.Ahmetov.
Premer-Mınıstr, sondaı-aq Úkimettiń bul máselege sporttyń memleket damýynyń negizi retinde zor kóńil bóletinine toqtalyp, «sportty serik etken ulttyń ǵana urpaǵy saý bolady»,-dedi.
Dúnıejúzilik qysqy Ýnıversıadanyń 2017 jyly Almatyda ótetini belgili. Sonymen qatar Qazaqstan 2022 jyly qysqy Olımpıada oıyndaryn ótkizý quqyǵyna ıe bolýǵa tapsyrys berip otyr. «Bul - múdirissiz júzege asyrýdy qajet etetin óte mańyzdy mindet»,-dedi osyǵan oraı Úkimet basshysy.
Serik Ahmetov sportshylarǵa alǵysyn bildire otyryp, olarǵa tabystar men sportta jeńister tiledi.
