Sporttyq quzǵa órmeleýshi Ámir Maımuratov álem kýbogy kezeńinde úzdik ondyqqa endi

ASTANA.KAZINFORM – Sporttyq quzǵa órmeleýden Qazaqstan quramasynyń ókili Ámir Maımuratov Qytaıdyń Gýııan qalasynda ótken Álem kýbogynyń kezeńinde úzdik ondyqqa endi.

QR UOK málimetinshe, irikteý kezeńin qazaqstandyq sportshy toǵyzynshy orynmen aıaqtap, 1/8 fınalǵa joldama aldy. Alaıda ol kezeńde qytaılyq Shoýhýn Chýǵa ese jiberip, jarysty onynshy orynmen túıindedi.

Chý fınalda japonııalyq Re Omasany utyp jeńimpaz atandy. Al úzdik úshtikti germanııalyq Leander Karmans túıindedi.

Qazaqstandyq sportshylar Damır Toqtarov, Jandos Qalıbaı, Beknur Altynbekov pen Álisher Murat irikteý kezeńinen óte almady.

Aıta keteıik, Narıman Qurbanov sporttyq gımnastıkadan 2025 jylǵy FIG World Challenge Cup týrnırinde at snarıadyndaǵy jattyǵýda altyn medal jeńip aldy.