Sporttyq gımnastıka: Azııa chempıonatynda ulttyq qurama kimdermen baq synaıdy
ASTANA. KAZINFORM — Ońtústik Koreıanyń Chechhon qalasynda 5-15 maýsym kúnderi sporttyq gımnastıkadan erler men áıelder arasynda Azııa chempıonaty ótedi. Bul – Olımpıadadan keıingi alǵashqy qurlyq jarysy. Áýeli erler 5-8 mamyrda kim myqtyny anyqtasa, 12-15 mamyrda áıelder júldege talasady. Bul týraly Týrızm jáne sport mınıstrligi málim etti.
Ulttyq qurama sapynda kimder synǵa túsedi?
Erler: Narıman Qurbanov, Mılad Karımı, Іlııas Azızov, Dmıtrıı Patanın men Álisher Toıbazarov, Roman Mamenov;
Áıelder: Aıda Qurbanova, Darıa ıAsınskaıa, Medına Qapbasova, Arına Lebedeva, Evelına Ejova.
Sportshylarymyzdyń negizgi qarsylasy kim?
Birinshiden, sporttyq gımnastıka – sary qurlyqta qarqyndy damyǵan sporttyń biri. Máselen, Parıj Olımpıadasynda erler arasyndaǵy 8 altynnyń jeteýi Azııa elderiniń enshisinde. Bul qatarǵa taǵy birneshe kúmis pen qola júldeni qosýǵa bolady. Japonııa, Qytaı gımnastary – kez kelgen baıraqty básekeniń basty favorıti. Sondaı-aq Qytaıdyń Taıpeıi, Qazaqstan, Fılıppın, Ońtústik Koreıa, Ózbekstan men Iordanııa komandasy turaqty túrde medal úshin talasqa qyzý aralasady.
Narıman Qurbanovtyń tutqaly at snarıadyndaǵy negizgi qarsylasy – Ahmad Ábý ál-Saýd (Iordanııa), Tokıo Olımpıadasynyń kúmis júldegeri, Azııa oıyndarynyń 2 dúrkin jeńimpazy Lı Chı Kaı (Qytaıdyń Taıpeıi), Hýr Výn (Ońtústik Koreıa). Taǵy bul qatarǵa 2 dúrkin Olımpıada chempıony Zoý Tszınıýan (Qytaı), Takakı Sýgıno men Shınnosýke Oka (Japonııa) syndy sportshylardy qosýǵa bolady.
Al erkin jattyǵýda álem chempıonatynyń qola júldegeri Mılad Karımımen baq synaıtyn qarsylastardyń qarasy qalyń. Otandasymyzdyń oń jambasyna keletin kópsaıysta, kerme jáne erkin jattyǵýynda 2 dúrkin Olımpıada chempıony, álem jáne Azııa birinshiliginiń jeńimpazy Karlos Edrıel ıÝlo (Fılıppın), Olımpıada chempıony Lıý ıAn, Zoý Tszınıýan, Chjan Bohen (bári Qytaı), Shınnosýke Oka (Japonııa), jarys qojaıyny Rıý Sýn Henniń esimin ataýǵa bolady. Bul gımnastyń bári osyǵan deıingi Olımpıadaǵa, álem chempıonatyna qatysyp, júlde alǵan.
Osyǵan deıingi Azııa chempıonatyndaǵy kórsetkish qandaı?
Byltyrǵy sary qurlyq chempıonaty mamyrda Tashkent qalasynda ótip, Qazaqstan komandasy eresekter arasynda 2 altyn, 2 kúmis, 1 qola medal jeńip alǵan. Ol kezde biz úshin birneshe tarıhı nátıje tirkelgen. Máselen, Mılad alǵash ret Azııa chempıonatynyń altynyn moınyna taqsa (kerme jattyǵýy), Aıda Qurbanova áıelder arasynda Qazaqstanǵa Azııa chempıonatynyń alǵashqy júldesin tartý etken.
Sondaı-aq 2023 jyly Sıngapýr astanasynda ótken chempıonatta Qazaqstan erler arasyndaǵy komandalyq synda alǵash ret júlde alǵan. Bizdiń gımnastar Qytaı men Japonııa quramasynan keıin tuǵyr satysyna kóterilgen.
Aıta keteıik, buǵan deıin sporttyq gımnastıkadan Azııa chempıonatyna kimder qatysatynyn jazǵan edik.