Sportty jeleý etip, aýyr qylmystar jasaǵan toptyń áreketi toqtatyldy
ASTANA.KAZINFORM — Qaraǵandy oblysynda polıtsııa óńirdegi krımınogendik ahýalǵa keri áser etken toptyń qyzmetin toqtatýǵa baǵyttalǵan jedel-tergeý is-sharalarynyń keshenin júrgizdi. Bul týraly ІІM baspasóz qyzmeti málim etti.
— Jedel ázirleme barysynda top músheleriniń biri sport salasyndaǵy bedelin paıdalanyp, sportty qoldaý jáne damytý degen syltaýmen jastardy aýyr jáne asa aýyr qylmystar jasaýǵa tartqany anyqtaldy. Urlyq, bopsalaý, alaıaqtyq jáne tonaý faktileri boıynsha alty qylmystyq is qozǵaldy. Qabyldanǵan sharalar men jedel áreketter nátıjesinde 20 adam ustaldy. 47 sanktsııalanǵan tintý júrgizilip, zańsyz aınalymnan atys jáne sýyq qarýlar, oq-dáriler, avtokólikter, iri kólemde aqsha, onyń ishinde shetel valıýtasy, sondaı-aq qylmystyq ister úshin mańyzy bar ózge de zattaı dáleldemeler tárkilendi. Toptyń zańsyz áreketi ózderiniń qylmystyq yqpalyn keńeıtýge, sonyń ishinde jastardy tartýǵa jáne zorlyq-zombylyq qylmystaryn jasaýǵa baǵyttalǵan. Ustalǵandardyń basqa da qylmystarǵa qatysy bar joǵy tekserilýde. Bul baǵyttaǵy jumys jalǵasatyn bolady, — dedi ІІM uıymdasqan qylmysqa qarsy kúres departamentiniń ókili Qýandyq Alpys.
Buǵan deıin QMA Batys Qazaqstan oblysy boıynsha departamenti azamattardyń bank shottaryna zańsyz qol jetkizip, qylmystyq qarjy operatsııalaryn júzege asyrǵan toptyń áreketin toqtatqanyn jazdyq.
