Sportty serik etkenim áskerı qyzmetime kóp paıdasyn tıgizdi – samboshy Jandos Óteǵulov
ORAL. KAZINFORM — Bıyl elimizde Sport kúni 18 tamyz kúni atalyp ótilmekshi. Mamandyq, kásibine qaramaı, sportpen turaqty aınalysyp, óz densaýlyǵyn shyńdap júrgen adamdar qaı salada da jeterlik. Ulttyq ulan qatarynda qyzmet etýmen birge túrli jarystarda el namysyn abyroımen qorǵap júrgen jandardyń biri – «Batys» óńirlik qolbasshylyǵyna qarasty Oral qalasynda ornalasqan 5517-áskerı bóliminiń áskerı qyzmetshisi, serjant Jandos Óteǵulov Kazinform tilshisine suhbat bergen edi.
- Jandos Rahmetollauly, aldymen ózińiz týraly qysqasha aqparat aıtyp ótseńiz?
- Men 1990 jyly 22 qyrkúıekte Batys Qazaqstan oblysy Kaztalov aýdanyndaǵy Aqpáter aýylynda ómir esigin ashtym. Sol aýylda orta mektepti bitirgennen keıin Oral qalasyndaǵy «Bolashaq» kolledjinen dene shynyqtyrý pániniń muǵalimi mamandyǵyn meńgerip shyqtym.
Oqý ornyn aıaqtaǵan soń, Almaty qalasyndaǵy Ulttyq ulannyń 5571-áskerı bóliminde azamattyq boryshymdy ótedim. Sodan keıin kelisimshart boıynsha Oral qalasyndaǵy 5517-áskerı bólimine qyzmetke ornalastym. Qazirgi tańda áskerı salada qyzmet etýmen birge osy Oraldaǵy Jáńgir han atyndaǵy Batys Qazaqstan agrarlyq-tehnıkalyq ýnıversıtetinde joǵary bilim alýdamyn.
Mamandyǵym dene shynyqtyrý pániniń muǵalimi bolǵanymen, ómirimdi áskerı qyzmetpen ushtastyrdym. Jalpy, sportty serik etkenim áskerı qyzmette de kóp paıdasyn tıgizdi dep aıta alamyn. Óıtkeni boıyńa tyń kúsh quıylǵandaı, únemi sergek júresiń. Onyń ústine sambo áýelden ózin-ózi qorǵaýǵa baǵyttalǵan sport túri ǵoı.
- Sportqa áý basta qalaı bardyńyz? Munyń basty sebebi nede? Ata-anańyz bul tańdaýyńyzǵa qarsy bolǵan joq pa?
- Sportqa kelýimniń esh qupııasy joq. Aqpáter aýylynda sol jyldary tek kúres úıirmesi dáýirlep turdy. Ákem de jastaıymnan sportqa baýlyp, ózińdi qorǵaýǵa kerek bolady dep qulaǵyma quıatyn. Áli esimde, kúres zalyna alǵash ret jetektep alyp barǵan edi ákem. Sol sátti eshqashan umytpaq emespin. Eń alǵashqy jattyqtyrýshym Jeńis Qanatuly Stamǵazıev men úshin kóp eńbek etti. Bapkerimniń arqasynda kóptegen oblystyq, respýblıkalyq, tipti halyqaralyq jarystarda top jaryp, júldeli oryndardan kórindim.
- Endeshe, eń basty tabystaryńyzǵa toqtalyp ótseńiz?
- Jaýyngerlik sambodan Qazaqstan chempıonatynyń eki dúrkin júldegerimen. Oǵan qosa qoıan-qoltyq urystan Ulttyq ulan birinshiliginde úzdik shyqtym. Eń úlken jetistigim retinde bıylǵy naýryzda Máskeýde ótken álem kýbogy kezeńinde jaýyngerlik sambodan qola júldeger atanǵanymdy aıta alamyn. Qazirgi kezde eresekter arasynda BQO boıynsha jaýyngerlik sambodan aǵa bapker Nuftolla Túmenovtiń qolastynda jattyǵamyn. Aldaǵy maqsatym – iri jarystarǵa qatysyp, chempıon ataný ne júlde alý. Munyń bári jyldar boıy tókken terdiń aqtalǵany bolar edi dep oılaımyn.
- Áskerı salaǵa kelgenińizge kóp boldy ma?
- Almaty qalasynda áskerı boryshymdy ótegen kezde bir jyl ishinde ózimdi jaqsy jaǵymnan tanyta bildim dep oılaımyn. Sonyń nátıjesinde kelisimshart boıynsha qalýǵa usynys tústi. Kóp oılanbastan kelisip, 2014 jyldan beri 10 jyldaı ýaqyt boıy óz qyzmetimdi atqaryp kelemin. Munyń esh qıyndyǵy joq. Kúndelikti jumysyńa adal, jaýapkershilikpen qarasań, alynbaıtyn qamal joq.
- Ata-anańyz da únemi demep otyratyn shyǵar? Ózińiz otbasy qurdyńyz ba?
- Ákem Rahmetolla Óteǵulov aýylda qarapaıym júrgizýshi qyzmetin atqardy. Al anam Kenjehanym Óteǵulova úı sharýasymen aınalysyp, bizge tálim-tárbıe berdi. Qazirgi tańda ekeýi de zeınetker, urpaqtarynyń qyzyq-qýanyshyna bólenip otyr. Otbasynda alty balamyz. Aldymda eki aǵam, eki ápkem, sosyn menen keıin inim bar. Ózime keler bolsam, ıá, úıli-barandymyn. Kúni búgin jan jarym Gúlsezim ekeýmizdiń bir perzentimiz bar. Otbasyma erekshe kóńil bólemin.
- Zaıybyńyz áskerı qyzmetke qalaı qaraıdy? Áskerı qyzmet pen sportty qatar alyp júrýińizge qarsy emes pe?
- Jan jarym meniń bul qyzmetime esh qarsy emes. Kerisinshe árdaıym qoldaý kórsetip, jumysymnan kelgende, jyly shyraımen qarsy alyp, kútip otyrady. Jarysqa ketsem, kishkentaı perzentimmen birge taǵatsyzdana tosyp, ýaıymdaıdy. Ózim de qolym bos ýaqytta udaıy otbasymnyń janynda ótkizip, birge bolǵandy jaqsy kóremin. Sebebi meniń basty kórermenderim men qoldaýshylarym – óz otbasym. Artymnan erip kele jatqan perzentime árdaıym úlgi bolý úshin tek jaqsylyq is-áreket jasaýǵa tyrysamyn. Sebebi áke degen otbasynyń tiregi ekenin bilemin.
- Ulttyq ulandaǵy áriptesterińiz de qoldaý kórsetetin shyǵar?
- Árıne, Ulttyq ulan óz áskerı qyzmetshilerin qaltqysyz qoldaıdy. Jarystarǵa qatysqan kezde demep, jattyǵýymyzǵa kedergi keltirmeıdi. Osy on jyl ýaqyt ishinde kásibı bilikti aǵalarymyz óz bilgenderin úıretip, sporttaǵy ár túrli týrnırlerge jiberip turdy. Sondaı-aq únemi aqyl-keńesterin aıtyp, jańa ádis-tásilderdi kórsetedi. Sondyqtan sporttyq mańsabyma óz qoldaýyn aıamaǵan Ulttyq ulan áskerı qurylymyna alǵysym sheksiz.
- Sóz sońynda keıingi jastarǵa ne aıtar edińiz?
- Artymyzdan erip kele jatqan jastarǵa aıtarym, patrıottyq sezim árkimniń boıynda bolýy tıis. Batyr babalarymyzdyń jolyn jalǵaý – bizdiń uly mindetimiz. Sol sebepti árdaıym namysty qoldan bermeı, tek alǵa umtylyp, aldyńǵy lekten kórinińizder der edim.
- Áńgimeńizge rahmet! Alar asý, shyǵar shyń azaımasyn!
Eske sala keteıik, budan buryn Ulttyq ulan jaýyngeriniń memlekettik marapat jaýapkershilikti eseleı túsetini týraly aıtqanyn jazǵan bolatynbyz.
