Sportty damytýǵa jańa serpin: Kókshetaýda aıtýly eki oqıǵa ótti
KÓKShETAÝ. KAZINFORM – Sońǵy jyldary Aqmola oblysy iri sporttyq is-sharalar ótetin mańyzdy ortalyqtardyń birine aınalyp keledi.
Buryn óńir kóbine dástúrli jarystarmen jáne qysqy sport túrlerimen tanylsa, búginde munda respýblıkalyq jáne halyqaralyq deńgeıdegi týrnırler uıymdastyrylyp, sporttyq ınfraqurylym qarqyndy damýda. Buǵan Kókshetaýda ótken eki mańyzdy oqıǵa — jergilikti atqarýshy organdardyń memlekettik qyzmetshileri arasyndaǵy respýblıkalyq spartakıadanyń saltanatty ashylýy jáne «Jańa jaǵalaý» aýmaǵyndaǵy jańa skeıt-parktiń paıdalanýǵa berilýi aıqyn dálel boldy.
Bıyl alǵash ret jergilikti atqarýshy organdardyń memlekettik qyzmetshileri arasyndaǵy respýblıkalyq spartakıada Aqmola oblysynda ótýde. Uıymdastyrýshylardyń aıtýynsha, sońǵy jyldary qalyptasqan zamanaýı sporttyq ınfraqurylym óńirdi osyndaı aýqymdy jarysty qabyldaı alatyn deńgeıge jetkizgen.
Búginde oblysta 343 myńnan astam adam dene shynyqtyrýmen jáne sportpen turaqty túrde aınalysady. Bul — óńir turǵyndarynyń shamamen árbir ekinshisi. Olardyń ıgiligi úshin 1,2 myńǵa jýyq sport nysany jumys isteıdi, al sporttyq ınfraqurylymmen qamtylý deńgeıi 70 paıyzdan asady. Sońǵy úsh jyl ishinde óńirde 50-den astam jańa sport nysany boı kóterdi. Olardyń qatarynda dene shynyqtyrý-saýyqtyrý keshenderi, sport mektepteri, basseınder jáne ámbebap sport alańdary bar.
Dál osy ınfraqurylymnyń negizinde kópfýnktsıonaldy Kokshe Arena sport kesheninde respýblıkalyq spartakıada bastaý aldy. Eske salsaq, bul sport kesheni Memleket basshysynyń tapsyrmasy boıynsha memleketke qaıtarylǵan aktıvter esebinen salyndy. Onyń qurylysyna Úkimet tarapynan 12,6 mlrd teńge bólindi. Búginde Kokshe Arena óńirdegi eń iri sport keshenderiniń biri sanalady jáne respýblıkalyq ári halyqaralyq deńgeıdegi jarystardy ótkizýge tolyq múmkindik beredi.
Spartakıadaǵa elimizdiń barlyq óńirlerinen kelgen memlekettik qyzmetshiler komandalary qatysýda. Bir apta boıy olar fýtzal, voleıbol, 3×3 basketbol, júzý, ústel tennısi, úlken tennıs, shahmat, toǵyzqumalaq, qazaq kúresi jáne kıbersportty qosa alǵanda, on sport túri boıynsha baq synaıdy.
Ashylý saltanatynda sóz sóılegen Aqmola oblysynyń ákimi Marat Ahmetjanov bul jarystyń óńir úshin aıryqsha mańyzǵa ıe ekenin atap ótti.
— Aqmola oblysy úshin memlekettik qyzmetshiler arasyndaǵy respýblıkalyq spartakıadany alǵash ret qabyldaý — úlken mártebe. Bul — óńirimiz úshin tarıhı oqıǵa ári sporttyq ınfraqurylymdy damytý baǵytynda atqarylyp jatqan jumystyń joǵary baǵasy. Aldaǵy ýaqytta da sportpen aınalysýǵa jáne eń joǵary deńgeıdegi jarystardy ótkizýge qolaıly jaǵdaı jasaý jumystaryn jalǵastyramyz, — dedi Marat Ahmetjanov.
Sonymen qatar óńirde sporttyq ınfraqurylymdy damytý tek iri sport keshenderiniń qurylysymen shektelmeıdi. Búginde kásibı sportshylarmen qatar barlyq turǵyndardyń belsendi ómir saltyn ustanýyna múmkindik beretin zamanaýı qoǵamdyq keńistikterdi qalyptastyrýǵa erekshe kóńil bólinýde.
Osyndaı nysandardyń biri — Kókshetaýdaǵy «Jańa jaǵalaý» jaǵalaýy. Qazirdiń ózinde munda serýendeý aımaqtary, demalys oryndary men buqaralyq is-sharalar ótkiziletin alańdar jasaqtalǵan. Endi bul aýmaq jańa zamanaýı skeıt-parkpen tolyqty.
Jańa alańnyń ashylýyna oraı Street Ride Contest jarysy uıymdastyrylyp, oǵan skeıtbordıng, BMX jáne samokat sportyn serik etken jastar qatysty. Kórermender úshin kásibı raıderlerdiń arnaıy shoý-baǵdarlamasy usynyldy.
— Búgin birinshi oryn alǵanyma óte qýanyshtymyn. Báseke óte joǵary boldy, sondyqtan bul jeńistiń men úshin orny erekshe. Kókshetaýda osyndaı zamanaýı skeıt-parktiń ashylǵany qýantady. Bul jer bolashaqta jańa raıderler tárbıelenip, kóptegen qyzyqty jarystar ótetin ortalyqqa aınalady dep senemin, — dedi jarys jeńimpazy Evgenıı Frantkevıch.
Keshtiń jalǵasy jastarǵa arnalǵan JANA JAGALAU FEST festıvaline ulasty. Sahnada qazaqstandyq oryndaýshylar BAKR men BayanSulu óner kórsetse, DJ BAUR mýzykalyq baǵdarlamany óz setterimen tolyqtyrdy. Sonymen qatar qonaqtar úshin ınteraktıvti alańdar men fotozonalar uıymdastyryldy.
Respýblıkalyq spartakıadanyń bastalýy men jańa skeıt-parktiń ashylýy aýqymy jaǵynan ártúrli bolǵanymen, olardyń basty maqsaty ortaq. Aqmola oblysynda bir jaǵynan iri respýblıkalyq jáne halyqaralyq jarystardy ótkizýge múmkindik beretin sporttyq ınfraqurylym damytylsa, ekinshi jaǵynan sportty kúndelikti ómirdiń ajyramas bóligine aınaldyratyn zamanaýı qalalyq orta qalyptasyp keledi. Búginde dál osy keshendi kózqaras óńirdiń sport salasyndaǵy turaqty damýynyń negizine aınalyp otyr.
