Sportty damytýǵa arnalǵan bıýdjet shyǵystary daryndy balalardy oqytýǵa baǵyttalady
ASTANA. KAZINFORM – Týrızm men sportty damytýǵa arnalǵan bıýdjet shyǵystary keler jyly 141 mlrd teńge kóleminde bolady. Bul týraly Májiliste «2025-2027 jyldarǵa arnalǵan respýblıkalyq bıýdjet týraly» zań jobasyn tanystyrý kezinde QR Qarjy vıtse-mınıstri Abzal Beısenbekuly aıtty.
«Týrızm men sportty damytýǵa arnalǵan bıýdjet shyǵystary 2025 jyly 141 mlrd teńge kóleminde josparlanǵan. Atalǵan shyǵystar joǵary jetistikter sportyn damytýǵa, onyń ishinde Ulttyq sport ortalyǵyn salýǵa, týrızm men týrıstik qyzmetti damytýǵa, sporttaǵy daryndy balalardy oqytý men tárbıeleýge baǵyttalady», - dedi A. Beısenbekuly.
Sonymen qatar ol mádenıet pen aqparat salasyn damytýǵa arnalǵan respýblıkalyq bıýdjettiń shyǵystary 164 mlrd teńge kóleminde josparlanǵanyn aıtty. Bul shyǵystar mynalarǵa baǵyttalǵan:
– mádenıet jáne muraǵat uıymdarynyń jumys isteýin qamtamasyz etý;
– mádenıette, ónerde jáne sportta daryndy balalardy oqytý jáne tárbıeleý;
– sondaı-aq memlekettik aqparattyq saıasatty júzege asyrý.
«Kelesi basym baǵyt – óńirlerdi qoldaý. Jalpy, 2025 jyly óńirlerge respýblıkalyq bıýdjet qarajaty esebinen 7,4 trln teńge bólinedi. Osy jylmen salystyrǵanda 348 mlrd teńgege artyq. Ol – bıýdjettiń jalpy shyǵystarynyń shamamen 30%-yn quraıdy. Olardyń ishinde 5,8 trln teńge «2023-2025 jyldarǵa arnalǵan jalpy sıpattaǵy transfertterdiń kólemi týraly» Zańǵa sáıkes sýbventsııalar, 426 mlrd teńge – jalpy sıpattaǵy transfertter týraly zańnyń qoldanylý kezeńinde qabyldanǵan normatıvtik-quqyqtyq aktiler boıynsha aǵymdaǵy nysanaly transfertter, sondaı-aq 1,2 trln teńge – ulttyq jobalar men óńirlerdi damytýdyń keshendi josparlaryn iske asyrý aıasynda qarastyrylǵan nysanaly damý transfertteri», - dedi vıtse-mınıstr.
Budan bólek, ekonomıkanyń naqty sektoryn damytýdy qoldaýǵa 2025 jylǵa 2,1 trln. teńge qarastyrylǵan.
Bul baǵyttyń basymdyqtary:
– agroónerkásiptik keshendi damytý;
– respýblıkalyq deńgeıdegi kólik ınfraqurylymyn damytý;
– shaǵyn jáne orta bıznesti damytý jáne qoldaý;
– ekologııa, sý jáne tabıǵı resýrstary;
– tsıfrlyq damý jáne aeroǵaryshtyq salany damytý.
