Sporttan tys qyzdarǵa qol kótermegenmin - MMA Azııa chempıonatynyń júldegeri Aıan Tursyn
Ol 1994 jyly 23 tamyzda Almaty qalasynda dúnıege kelgen. Sportpen 10 jyldan beri aınalysyp keledi. Jas sportshynyń qorjynynda qazir 25 altyn, 15 kúmis, 15 qola medal bar. Aıan Tursyn ýshý-sandadan eki dúrkin el chempıony, tatamıden bes dúrkin Qazaqstan chempıony.
Sport dese ishken asyn jerge qoıatyn, taekvondodan, ýshýdan jáne jekpe-jekten sport sheberi, er minezdi boıjetkenmen tildesip, nelikten aýyr sport túrin tańdaǵanyn bildik.
- Aıan, nelikten osy sportty tańdadyńyz?
- Men ózim kishkene kezimnen ul balalardyń arasynda óstim. Kóshede de tek uldarmen oınaıtynmyn. Shańyraqtaǵy balalar men jasóspirimderge arnalǵan Olımpıadalyq rezervtegi sport mektebinde oqydym. Onda da aınalam kóbine uldar boldy. Múmkin sodan bolar
- Soǵan qaraǵanda bala kezińizde buzyq bolǵansyz-aý shamasy? Qansha balanyń murnyn buzdyńyz?
- Buzyq bolǵan joqpyn (kúlip) Mektep jasymda tek uldarmen tóbelesetinmin. Qyzdardy aıaıtynmyn. Tóbeles bola qalǵan jaǵdaıda qyzdarǵa tıispeıtinmin.
- Azııa chempıonaty júlde alǵan birinshi saıysyńyz ba?
- Men negizi aralas jekpe jekke aýyspaı turyp, taekvandomen aınalysqanmyn. Taekvando boıynsha talaı ret jarysqa shyqqanmyn. Aralas jekpe-jekten áıelder arasyndaǵy halyqaralyq saıystarǵa bıyldan bastap jibere bastady. Sondyqtan, men alǵashqy júldegermin.
- Nege aralas jekpe jekke aýystyńyz? Bul taekvandoǵa qaraǵanda jaraqat alý qaýpi kóp sportqa jatady ǵoı?
- Óıtkeni, taekvandoda elektrondy júıe paıda boldy. Buryn shynymen tóbelesetin bolsaq, qazir tek adam bir jerine tıgizse boldy upaı janady. Sol úshin maǵan qyzyq emes bolyp qaldy. Shynaıylyq joǵalyp ketken sııaqty. Bıyldan bastap MMA aýysyp jarystarǵa shyǵa bastadym.
- Osy ýaqytqa deıin qandaı jaraqat aldyńyz?
- Tek kózimniń kógergeni bolmasa. Áli qatty jaraqat áli almadym.
- Bolashaqta qandaı josparyńyz bar?
- Álem chemponaty ótedi. Qazir sol jarysqa daıyndalamyz. Sol jerde ózimdi kórsetemin degen oıdamyn. Bul oraıda, maǵan senim artyp, jattyqtyryp, talmaı eńbek etip júrgen bapkerim Mamyralıev Nurlan Kenjenulyna úlken alǵysymdy bildirgim keledi. Barlyq jeńisimniń eńbegi osy kisiniki. Sonymen qatar, halyqaralyq jarysqa qatysýǵa múmkindik bergen Almaty MMA Federatsııasynyń prezıdentine, MMA Qaýymdastyǵyna, MMA quramasynyń bas bapkeri Jangalov Baıan Maratulyna alǵys aıtqym keledi. Sondaı-aq, áýesqoı jekpe-jekten kásipqoı túrine aýyssam degen oı bar. Álem chempıony ataǵyna qol jetkizgen jaǵdaıda bapkerlikke ketemin. Ózim qazir Qazaq memlekettik Qyzdar pedagogıkalyq ýnıversıtetiniń «Dene shynyqtyrý jáne sport» mamandyǵy boıynsha 2 kýrsta oqyp jatyrmyn.
- Sıngapýrda ótken Azııa Chempıonatynda kimdermen judyryq túıistirdińiz?
- Bul meniń bul sport túrimen qatysqan eń birinshi úlken jarysym boldy. El namysyn áıelder arasynda tuńǵysh ret qorǵaıtyn bolǵandyqtan qobaljý men úlken jaýapkershilik turdy. Ekinshiden, ol Azııa chempıonatyna kil myqtylar jınaldy. Jartylaı fınalda malaızııalyq sportshy Amıra Makhtarmen kezdestim. Ony osal deı almaımyn. Daıyndyǵy jaqsy. Tek kózinen qatty jaraqat alyp qalyp, jarysty ary qaraı jalǵastyra almady. Aqtyq synda amerıkalyq sportshymen shyqtym. Ol sportshy qyz malaızııalyq sportshyǵa qaraǵandy myqty boldy. Onyń rekordy da, tájirıbesi de menikinen kóbirek boldy. Boıy da uzyn. Biraq, biz arnaıy taktıka qurdyq. Jattyqtyrýshylarym maǵan jyldamdyqqa kóbirek kóńil ból dedi. Sonyń bárin eskerip 1 raýndta utqan bolatynmyn. 2-shi raýnd bastalar aldynda men demalyp otyratyn buryshqa sý kóp tógilgen bolatyn. Sol burysh ókinishke oraı durys súrtilmegendikten, 2-shi raýndta sol buryshqa kelgende taıyp qulap tústim. Referı oıyndy toqtatyp, sol jerdi súrtkizetin shyǵar dep edim, referı oǵan mán bermedi. Sol sátti qarsylasym paıdalanyp, meniń arqamnan kelip, qylqyndyrý ádisin jasamaqshy boldy. Men barymdy salyp turyp ketpekshi bolǵanda, aıaǵym taıǵanap, qaıtadan qulap tústim. Taǵy bir ret turyp kórip edim, taǵy taıǵanap quladym. Sosyn ol 2-3 soqqy jasap edi, referı oıyndy toqtatyp, jeńisti amerıkalyq sportshy qyzǵa berdi. Árıne kóńilim qatty tústi, barymdy salǵan edim. Qazaqstannyń kók baıraǵyn jelbiretip, ánuranyn oınatsam dep edim. Buıyrmady... Degenmen, úlken sporttyq doda, Azııa chempıonatynda kúmis júlde alý men úshin úlken qýanysh, úlken jetistik.
- Aıan, úı sharýasyna qalaısyz?
- Bir úıdiń sharýasyn dóńgeletemin (kúlip)Tamaq ta pisiremin, basqasyn da isteımin.
- Áńgimeńizge rahmet. Áıelder arasynda júlde alǵan eń birinshi qazaqstandyq qyz bolǵanyńyzdyń ózi úlken mártebe. Bul jetistigińizdiń alǵashqy bastamasy, alar asýyńyzdyń aldy dep oılaımyz.
- Rahmet.