Sporttaǵy álemdik jetistiktiń bári buqaralyq sportty damytýdan bastalady - G. Isimbaeva
ASTANA. QazAqparat - Sporttaǵy álemdik jetistikterdiń bári buqaralyq sportty damytýdan bastalady. Búgin Májiliste ótip jatqan buqaralyq sportty jáne dene shynyqtyrýdy damytý taqyrybyndaǵy Úkimet saǵatynda palata tóraǵasynyń orynbasary Gúlmıra Isimbaeva osylaı málim etti.
«Buqaralyq sportty damytý salasynda aldaǵy ýaqytta bıýdjetterdi qalyptastyrý úshin qaldyq qaǵıdatyn paıdalanýǵa jol berilmeýi kerek. Óıtkeni, qazir buqaralyq sportqa bıýdjetti josparlaýda júıelilik joq. Jalpy mınıstrler de, jergilikti atqarýshy organdar da azamattardyń sporttaǵy úlken jetistikterine mán beredi. Árıne, oǵan mán berilýi kerek, bul bizdiń elimizdiń ımıdji men halyqaralyq deńgeıin bildiredi. Alaıda, sporttaǵy jetistiktiń ózi buqaralyq sportpen baılanysty», dedi G. Isimbaeva.
Onyń aıtýynsha, sporttaǵy joǵary jetistikke jetý eń aldymen buqaralyq sporttyń damýyna táýeldi. «Óıtkeni, chempıondardyń basym bóligi buqaralyq sporty damyǵan, olardyń ósýine jaǵdaı jasalǵan ortadan shyǵady. Sondyqtan da, buqaralyq sportty damytsaq, álemdik sportta da jetistikke jetemiz», - dedi G. Isimbaeva.
