Sporttaǵy jemqorlyq: 1,3 mlrd teńge bıýdjetke qaıtaryldy
ASTANA. KAZINFORM – Sybaılas jemqorlyqqa qarsy qyzmet Týrızm jáne sport mınıstrligimen birlesip ótken jyly sportty qarjylandyrý salasyndaǵy sybaılas jemqorlyq táýekelderine syrtqy taldaý júrgizdi.
Nátıje otandyq sporttyń damýyna jáne álemdik sport arenasynda joǵary kórsetkishterge qol jetkizýge kedergi keltiretin júıeli sybaılas jemqorlyq táýekelderiniń bar ekendigin aıǵaqtaıdy. Kásibı klýbtar ózderiniń sporttyq ınfraqurylymyn salýdyń ornyna basshylyqtyń jalaqysyn kóterýge, legıonerlerge tólemder arqyly shyǵarýǵa, oqý-jattyǵý jıyndaryn uıymdastyrýǵa qarajat jumsady.
Taldaý qorytyndysy boıynsha sportty damytý basymdyqtaryn qaıta qaraýǵa, oqý-jattyǵý jıyndaryn ótkizýdi baqylaýdy qatańdatýǵa, kásibı klýbtar men federatsııalardyń bıýdjetterin qysqartýǵa, qarjylandyrýdy ortalyqtandyrýǵa, sondaı-aq tsıfrlandyrýdy engizýge baǵyttalǵan 50-den astam usynym engizildi.
Olardy qaraý nátıjesi boıynsha 2024 jylǵy jeltoqsanda jáne 2025 jylǵy naýryzda birqatar salalyq erejelerge túzetýler engizildi. Endi fýtbol kásipqoı klýbtary úshin memleketten qarjylandyrý alý úshin balalar-jasóspirimder jáne jastar fýtbolynyń jeke bólimsheleriniń, jastar komandalarynyń, stadıondar men sabaqtar ótkizýge arnalǵan qurylystardyń bolýy týraly talaptar qoldanylady.
– Oqý-jattyǵý jıyndaryna baqylaý kúsheıtildi, olardy ótkizýge lımıt belgilendi. Agenttiktiń usynymdary boıynsha osy jyly 15 sáýirde «Dene shynyqtyrý jáne sport týraly» Zańǵa Týrızm jáne sport mınıstrliginiń kásibı sport klýbtaryn ustaýǵa bólinetin bıýdjet qarajatynyń lımıtin, sondaı-aq Qazaqstan Respýblıkasynyń azamattary bolyp tabylmaıtyn sportshylardy bıýdjet esebinen qarjylandyrýǵa tyıym salýdy bekitý jónindegi quzyretin kózdeıtin tolyqtyrýlar engizildi. Sonymen qatar, Memleket basshysynyń tapsyrmasyn oryndaý aıasynda kásibı sportty, onyń ishinde fýtbol klýbtaryn qarjylandyrý 6,7 mlrd teńgege (60,5-ten 53,8 mlrd teńgege deıin) qysqartyldy, - delingen Sybaılas jemqorlyqqa qarsy is-qımyl agenttigi habarlamasynda.
Sporttyq is-sharalarǵa jáne jalaqyǵa ústemeaqyǵa negizsiz jumsalǵan 1,3 mlrd teńge bıýdjetke qaıtaryldy. Basqarýdyń tıimsizdigine baılanysty 11 sport nysany memlekettik mekemelerdiń balansyna berildi.
Qabyldanǵan sharalar otandyq sportty jáne óskeleń urpaqtyń sporttyq áleýetin damytýǵa baǵyttalǵan.
Aıta keteıik, Ekologııa mınıstrligine qarasty 8 qyzmetker jemqorlyq boıynsha sottaldy.