Sporttaǵy destrýktıvti dinı ıdeologııamen kúres: El bıligi qujat ázirledi
Sport salasyndaǵy destrýktıvti dinı ıdeologııanyń taralýyna jol bermeýge baǵyttalǵan jol kartasynyń jobasy ázirlendi. Bul týraly Májilis depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan, dep habarlaıdy Kazinform.
«Qazirgi tańda ýákiletti organ quqyq qorǵaý jáne arnaıy organdarmen birlesip, osy salada (teris aǵym jetegindegi adamdarmen jumysty kúsheıtý) júıeli jumystar júrgizýde. Bul rette, destrýktıvti dinı ıdeologııanyń halyq arasynda taralýyna jol bermeý jónindegi 2023-2024 jyldarǵa arnalǵan is-sharalar jospary ázirlenip, iske asyrylýda. Іshki ister mınıstrligi, Ulttyq qaýipsizdik komıteti, Bas prokýratýra jáne basqa da memlekettik organdarmen 2023-2025 jyldarǵa arnalǵan sport salasyndaǵy destrýktıvti dinı ıdeologııanyń taralýyna jol bermeýge baǵyttalǵan jol kartasynyń jobasy ázirlendi», - dedi Úkimet basshysynyń orynbasary jaýabynda.
Onyń atap ótýinshe, ınternet jelisinde aqparattyq-profılaktıkalyq jáne qarsy nasıhat jumystaryn uıymdastyrý maqsatynda ádistemelik usynym ázirlenip, óńirlerge jiberildi.
«Ǵylym jáne joǵary bilim mınıstrligi joǵary oqý oryndarynda teologmamandardy daıarlaýdy júzege asyryp keledi. Sondaı-aq «Nur-Mýbarak» ıslam mádenıeti ýnıversıteti janynda jyl saıyn teologtardyń biliktiligin arttyrý kýrstary uıymdastyrylýda. Osy turǵyda kásibı mamandardy daıarlaý, teologtardyń biliktiligin arttyrý, olarǵa qoıylatyn talaptardy birizdendirý qolǵa alynady. Qazirgi ýaqytta din salasyndaǵy bilim berý boıynsha negizgi qujat – 14 mamandyqtan turatyn «dinı qyzmet salasyndaǵy kásibı standart» ázirlenýde. Jańa standart din salasyndaǵy mamandardyń biliktiligin arttyrady jáne úzdiksiz kásibı damýǵa múmkindik beredi. Sonymen qatar, Úkimette din máselesi boıynsha óńirlerdegi teolog mamandar men quzyrly organdardyń qatysýymen kezdesý ótti. Solardyń usynystary negizinde ázirlengen Jol kartasynyń jobasy qosymsha pysyqtalýda», - dedi Tamara Dúısenova.
