Sporttaǵy bıylǵy jyldyń basty oqıǵalary qandaı
Bıyl álemdi jankúıerler asyǵa kútetin birneshe bedeldi jarystar kútip tur. Olardyń barlyǵynda qazaqstandyq sportshylar baq synaıdy. Olardan medal alý múmkindigimiz qandaı ?
Kazinform tilshisi atalǵan jarystar jóninde tarazyǵa tartyp, qazaqstandyq sportshylardyń daıyndyǵyn zerdelep kórgen edi.
Jastarǵa zor senim artamyz
Alǵashqysy 2024 jyldyń 19 qańtarynda Ońtústik Koreıanyń Kanvondo qalasynda ótetin IV qysqy jasóspirimder Olımpıadasy. Dúbirli doda 1 aqpanǵa deıin sozylady.
Olımpıadaǵa jer-jahannyń 70 elinen 1800 (950 ul, 950 qyz) sportshy qatysady dep kútilýde. Sporttyń 7 túrinen 15 dıstsıplına boıynsha 81 medal jıyntyǵy sarapqa salynady. Jasóspirimder Olımpıadasy osymen tórtinshi ret ótkeli otyr.
Qazirgi tańda Qazaqstan jasóspirimder quramasynyń qorjynynda bıatlon, konkımen júgirý, short-trek, kerlıng, shaıbaly hokkeı, shańǵy jarysy, shańǵymen tramplınnen sekirý, shańǵy qossaıysy, taý shańǵysy, frıstaıl, parallel mogýl túrinen 30 joldama bar.
Qysqy jasóspirimder olımpıadasy 2012 jyldan bastap ótip keledi. Buǵan deıin Avstrııa, Norvegııa jáne Shveıtsarııada ótti. Koreıa – Olımpıadany qabyldaǵan tórtinshi el.
Chehııada sheberligimizdi shyńdaı túsemiz
Shaıbaly hokkeıden Qazaqstan ulttyq quramasy 2024 jyldyń 10-26 mamyry aralyǵynda Chehııanyń Praga jáne Ostrava qalalarynda on alty quramanyń qatarynda synǵa túsedi. Olar A tobynda (Ostrava) AQSh, Germanııa, Shvetsııa, Slovakııa, Latvııa, Frantsııa, Polshamen sheberlik baıqasady.
Byltyr ulttyq qurama tizginin ustaǵan qazaqstandyq Ǵalym Mámbetálıev sol qyzmetin bıyl da jalǵastyrady. Bul sheshim Qazaqstan hokkeı federatsııasynyń konferentsııasy otyrysynda qabyldandy.
Sondaı-aq, shaıbaly hokkeıden 20 jasqa deıingiler arasyndaǵy el quramasy bıyl elıtalyq dıvızıonda oınaýǵa múmkindik aldy. Olar birinshi dıvızıonnyń A tobynda birinshi orynǵa turaqtap, úzdikter qataryna kóterildi.
Al ótken jyldyń sáýirinde bizdiń jasóspirimder IA dıvızıonyndaǵy álem chempıonatynda birinshi oryndy ıelenip, elıtaǵa kóterildi.
Atap óterligi, bıyl ulttyq, jastar jáne jasóspirimder quramalary álem chempıonatynyń top-dıvızıonynda oıyn kórsetedi. Bul el tarıhynda alǵashqy márte kezdesip otyr.
Qurlyqtyq doda qol bulǵap tur
Fýtboldan Qazaqstan quramasy 2024 jylǵy Eýropa chempıonaty fınaldyq satysyna shyǵýyna áli de múmkindigi bar. Endi ÝEFA Ulttar lıgasy pleı-off satysy arqyly qurlyqtyq doda joldamasyn qaltaǵa basýǵa bolady.
El quramasy Ulttar lıgasynda S jolymen 2024 jyldyń 21 naýryzynda jartylaı fınalda syrt alańda Grekııamen kezdesedi. Jeńgen jaǵdaıda 26 naýryzda taǵy da syrt alańda Grýzııa-Lıýksembýrg jubynyń jeńimpazymen sheberlik baıqasady.
Qazaqstandyq fýtbolshylar Eýropa chempıonaty irikteý satysynda besinshi márte baq synap otyr. Óz tobynda 2008, 2012 jyldarda - 6, 2016, 2020 jyldarda - 5 oryn aldy.
Qazaqstandyq fýtbolshylar H tobynda Danııa, Slovenııa, Fınlıandııa, Soltústik Irlandııa jáne San-Marıno quramalarymen synǵa tústi. Alǵashqyda fýtbol sarapshylary olardy óz tobynda sońǵy orynnyń birin mise tutady degen boljam jasaǵan edi. Dese de irikteý satysy barysynda el quramasy joǵary deńgeıde oıyn kórsete bildi. Óz tobynda úshinshi orynǵa turaqtady.
Eýropa chempıonatynyń fınaldyq satysy 14 maýsym men 14 shilde aralyǵynda Germanııada ótkiziledi.
Parıjge kimder barady ?
Bıylǵy jyldyń basty oqıǵasynyń biri – Parıj Olımpıadasy 2024 jyldyń 26 shildesi men 11 tamyzy aralyǵynda ótedi.
Dúbirli dodada 32 sport túrinen júlde óz ıesin tabady. Álemniń 200-den asa memleketinen kelgen sportshylar 306 júlde jıyntyǵyn sarapqa salady. Oǵan baratyn qazaqstandyq sportshylar sany áli tolyq belgili bolǵan joq. Alda irikteý kezeńderi ótedi. Jarysqa baratyndar sany sodan keıin belgili bolady.
2024 jylǵy Olımpıada oıyndarynyń baǵdarlamasyna akademııalyq esý, badmınton, basketbol (onyń ishinde 3x3 basketbol bar), boks, kúres, breıkıng, velosport, sý sporty túrleri, voleıbol, jaǵajaı voleıboly, gandbol, gımnastıka (batýt, sporttyq gımnastıka, kórkem gımnastıka), golf engizilgen. Sondaı-aq, onyń baǵdarlamasynda baıdarka men kanoede esý, dzıýdo, at sporty, jeńil atletıka, ústel tennısi, jelkendi sport, regbı-7, serfıng, skeıtbordıng, qazirgi bessaıys, sporttyq quzǵa órmeleý, sadaq atý, sporttyq atý, tennıs, trıatlon, taekvondo, aýyr atletıka, fýtbol, kógaldaǵy hokkeı bar. Olımpıadanyń jańa baǵdarlamasyna breıkıng, sporttyq quzǵa órmeleý, skeıtbordıng pen serfıng qosyldy.
Jazǵy Olımpıada oıyndaryna qazaqstandyq sportshylar táýelsiz elimizdiń atynan 1994 jyldan beri qatysyp keledi. Qazirge deıin barlyǵy 72 medal enshilep úlgerdi. Onyń ishinde boks, aýyr atletıka, jeńil atletıka, kúres, velosport, qazirgi bessaıys, sýǵa júzý, dzıýdo, oqý atý, karate, taekvondo bar.
Tórtinshi márte úzdikter qatarynda
Fýtzaldan Qazaqstan quramasy 2024 jylǵy álem chempıonaty fınaldyq satysynda oınaıdy. Jarystyń elıtalyq satysynda el quramasy Nıderland (2:0, 2:0), Ázerbaıjan (4:2, 3:2) jáne Rýmynııa (4:3, 2:0) quramalaryn eki márteden jeńip, 18 upaımen A tobynda birinshi oryn aldy.
Aıta ketsek, el quramasy álem chempıonatynyń fınaldyq satysynda 2000, 2016, 2021 jyldarda synǵa tústi. Olar 2021 jyly 4-orynǵa taban tiredi.
Álem chempıonaty 2024 jyldyń 14 qyrkúıek jáne 6 qazan aralyǵynda Ózbekstanda ótkiziledi. Onda barlyǵy 24 qurama baq synaıdy. Eske salsaq, budan buryn «Qazaqstan hokkeıi: Sáttilik serik bolǵan jyl» taqyrybynda oı qozǵadyq.
Sondaı-aq, el fýtbolyndaǵy eleýli oqıǵalar tarazyǵa tartyldy.
