Sportta úlken jetistikke jetken qandasymyz týraly fılm jaryq kórdi
ASTANA. KAZINFORM - Elordadaǵy «Saryarqa» saýda jáne oıyn-saýyq ortalyǵynyń kınoteatrynda Ulttyq kıno ortalyǵynyń qoldaýymen Dala cinema kompanııasy túsirgen «Úmit sáýlesi» fılminiń jabyq kórsetilimi ótti.
Astana qalalyq sport basqarmasynyń baspasóz qyzmeti málim etkendeı, «Úmit sáýlesi» fılminiń basty keıipkeri — Astana qalasynyń para sportshysy Erǵalı Shameı. Monǵolııada týǵan qandasymyz 18 jasynda ata-jurtyna birjola qonys aýdaryp, 2015 jyly jattyqtyrýshynyń arnaıy shaqyrtýymen sportqa bet burǵan.
«Erǵalı Shameı qazirgi tańda óziniń jaýyngerlik bolmysy, eńbekqorlyǵy jáne sportqa eptiliginiń arqasynda para dzıýdodan QR eńbek sińirgen sport sheberi, para dzıýdodan Álem jáne para Azııa oıyndarynyń chempıony atanyp úlgerdi», - delingen habarlamada.
Aıta ketelik, paradzıýdodan álem chempıony Erǵalı Shameıdiń ómirine negizdelgen fılm bıyl Frantsııada ótetin Paralımpıada oıyndarynyń aldynda el sportshylaryna qoldaý kórsetip, jetistikterine laıyqty nazar aýdarýǵa da septigin tıgizedi.
Fılmde basty keıipkerdi somdaý elimizge tanymal akter Nazar Sherhanǵa buıyrypty.
"Nazardy rólge bekitýge birden-bir sebep — onyń oqıǵanyń prototıpine syrtqy kelbetiniń qatty uqsastyǵy", - deıdi túsirilim toby.
Fılmde, sonymen birge, Erǵalıdiń prototıpi de epızodtyq róldi somdaǵan.
Uıymdastyrýshylardyń aıtýynsha aldaǵy ýaqytta shynaıy oqıǵaǵa qurylǵan fılmniń telearnadan kórsetilýine kúsh salynatyn bolady.
Fılmdi «Ulttyq kınony qoldaý memlekettik ortalyǵynyń» tapsyrysy boıynsha DALA cinema kompanııasy túsirdi.
