Sportstan.kz ınternet-saıty ashyldy
ALMATY. 24 mamyr. QazAqparat - Qazaqstandaǵy barlyq sport nysandarynyń foto jáne vıdeo beınesi usynylǵan anyqtamalyq katalog paıda boldy. Ony álemniń kez kelgen turǵyny endi jańadan ashylǵan Sportstan.kz saıtynan tamashalaı alady. Bul resýrs el aýmaǵynda ornalasqan sporttyq nysandardy tez jáne ońaı tabýǵa múmkindik beredi.
«Saıtty qoldanýshylar sport túrin tańdap, unaǵan ǵımaratqa vırtýaldy saıahat jasaı alady. Bul durys sheshim qabyldap, ýaqytty únemdeýge kómektesedi», - deıdi «Jas Star» Jastar bastamalary ortalyǵynyń baspasóz hatshysy Arman Sabyrbaı. Onyń aıtýynsha, bul jobany «Jas Star» qoǵamdyq uıymy «Efes Kazakhstan» qoldaýymen júzege asyryp otyr.
«Efes Qazaqstan» Korporatıvtik qatynastar departamentiniń dırektory Shyńǵys Qaskeevtiń sózine qaraǵanda, «Qoǵamdyq mańyzǵa ıe bastamalardy júzege asyrý bıznes-qaýymdastyqtardyń Qazaqstan Respýblıkasy azamattary aldyndaǵy áleýmettik jaýapkershiliginiń negizgi kórsetkishteriniń biri bolyp tabylady. Kompanııa kómekke muqtaj balalar úıine, múgedekter qoǵamyna, turmysy tómen otbasydan shyqqan balalarǵa, soǵys ardagerleri men qarttarǵa qarjylyq kómek kórsetedi. Sondaı-aq, qazaqstandyqtardyń ómirin jaqsartýǵa arnalǵan áleýmettik baǵdardaǵy bastamalarǵa úlken mán beredi».
