Sportshylarymyz aldyna qoıǵan barlyq maqsattar men mindetterdi artyǵymen oryndady - T. Ermegııaev

Bul jaıynda búgin QR Týrızm jáne sport mınıstrliginiń vıtse-mınıstri Talǵat Ermegııaev Almatyda arnaıy ótken baspasóz máslıhatynda aıtty.

Onyń aıtýynsha, 7-Qysqy Azııa oıyndarynyń uıymdastyrylýyna 250 mln. AQSh dollary jumsalǵan, al sporttyq oıyndardyń ınfraqurylymyna 1 mlrd. 400 mln. dollar ketken. «Máselen, halyqaralyq shańǵymen tuǵyrdan sekirý, frıstaıl oıyndarynyń keshenderi sııaqty úlken nysandar salyndy, endigi ýaqytta olar halyqtyń ıgiligi úshin qyzmet etetin bolady», - dedi T. Ermegııaev.

Sonymen qatar ol keıbir nysandar Azıada oıyndaryna arnalyp salynsa, keıbiri jalpy jatyǵýlar ótkizý úshin de turǵyzylǵandyǵyn aıtty.

7-Qysqy Azııa oıyndaryn uıymdastyrý jónindegi dırektsııanyń vıtse-prezıdenti Evgenıı Nıkıtınskıı óz kezeginde keshe ótken dúbirli oıynda óner kórsetken barlyq sportshylar men jattyqtyrýshylarǵa jáne osy úlken is-sharany buqaraǵa keńinen jetkize bilgen BAQ ókilderine alǵysyn bildirdi. «Sonymen qatar osy oıyn barysynda salynǵan sporttyq nysandarda jumys istegen adamdar men bizdiń komandany qoldaý úshin kelgen barlyq jankúıerlerge alǵysym sheksiz», - deıdi E.Nıkıtınskıı.

Sondaı-aq ol atalǵan oıyn joǵary dárejede ótkendigin jáne múmkindik týsa, álemdik qysqy oıyndardy ótkizýge daıyn ekenimizdi jetkizdi. «Jańadan salynǵan sporttyq nysandar barlyq halyqaralyq talaptarǵa saı keledi, ári ol oıyndardy ótkizýge elimizdiń áleýeti de jetedi», - deıdi ol.