Sportshylarymyz aldaǵy kúnderi de júldegerler qatarynda bolady - Temirhan Dosmuhambetov
ALMATY. Tamyzdyń 20-sy. QazAqparat /Erbol Turymbetov/ - Jasóspirimder Olımpıadasyndaǵy bizdiń komandalyq eseptegi 11-shi orynymyz - jetistik bolyp sanalady. Sonymen qatar, aldaǵy kúnderde de bizdiń sportshylardyń júlde alatyn múmkindikteri bar.
Bul týraly búgin Týrızm jáne sport mınıstri Temirhan Dosmuhambetov Almatyda jýrnalısterge bergen suhbatynda málimdedi, dep habarlaıdy QazAqparat.
Buǵan deıin belgili bolǵandaı, bizdiń sportshylar arasynda ziltemir kóterýden Jazıra Japparqulova altyn medaldi jeńip alsa, Zúlfııa Chınshanlo kúmis júldeni ıelendi. 77 kg salmaqtaǵy Rústem Sybaı uldar arasynda qola júldeger atandy.
Esterińizge salaıyq, grek-rım kúresinen 69 keli men 42 keli salmaqtaǵy balýandarymyz Jánibek Qondybaev pen Aqan Baımaǵambetov komandamyzdyń qorjynyna eń alǵashqy júldelerdi salǵan bolatyn.
«Jasóspirimder Olımpıadasyndaǵy komandalyq eseptegi 11-shi orynymyz - jetistik bolyp sanalady. Sonymen qatar aldaǵy kúnderde de bizdiń sportshylardyń júlde alatyn múmkindikteri bar. Sebebi, bizdiń negizgi úmitimiz - boks pen dzıý-do jáne basqa da sport túrleriniń jarystary endi bastalady», dedi mınıstr.
Taekvondo básekesinde ońtústikqazaqstandyq Nursultan Mamaev (55 kg) kúmis júldege qol jetkizgen edi.
Ázirge aldyńǵy úshtiktiń qatarynda Reseı, Qytaı jáne Ázirbaıjan komandalary tur. Olımpıada 26 tamyzǵa deıin jalǵasady.
