Sportshylary júldeli oryn alǵan bapkerlerge yntalandyrý tólemaqysy tólenedi
Oyń aıtýynsha, qujatta elimizde osy salalardy damytýdyń jańa baǵytyn aıqyndadyq, buqaralyq sportqa, onyń ishinde balalar men jastar arasynda, azamattardyń barlyq sanattary úshin dene shynyqtyrý jáne sportpen shuǵyldanýdyń jalpyǵa qoljetimdiligine, dene shynyqtyrýǵa, áýesqoı jáne kásiptik sportqa teń kózqarasqa, joǵary jetistikter sportyn jáne beıimdelgish sportty damytýǵa basa nazar aýdarylǵan.
«Mysaly, 2029 jylǵa deıin jyl saıyn elimiz boıynsha 20 myńnan astam sporttyq-buqaralyq is-shara ótkizýge nıettimiz. Al aýyldyq jerlerde osy baǵytty damytý úshin aýyldaǵy sport nusqaýshylarynyń sany 4 myńǵa deıin ulǵaıady. Mektepter men joǵary oqý oryndarynyń janynan turaqty negizde jumys isteıtin sport klýbtary men komandalar qurylady. Olardyń arasynda aýdandyq, oblystyq jáne respýblıkalyq jarystar ótedi. Halyqtyń belgili bir toby: erekshe qajettiligi bar adamdar, memlekettik qyzmetshiler, medıtsına qyzmetkerleri, BAQ ókilderi, qarjy qurylymdary jáne t.b. arasynda spartakıadalar uıymdastyrylady. Prezıdenttik testilerdiń normatıvteri jańartyldy. Atap aıtqanda, sport túrleri azaıdy, al olardy tapsyrǵan azamattarǵa arnaıy sertıfıkat beriledi. Egde jastaǵy qazaqstandyqtarǵa erekshe kóńil bólinedi. Ár túrli jastaǵy azamattardy qamtıtyn «qoljetimdi sport» jobasyn iske asyrý jalǵasady. Elimizdiń barlyq óńirlerinde skandınavııalyq júris, ıoga jáne t. b. sabaqtar uıymdastyrylady» dep jazdy Ashat Oralov Telegram paraqshasynda.
Ulttyq sport túrlerin nasıhattaýǵa sporttyq-buqaralyq is-sharalardy, onyń ishinde aýyldyq jerlerde ótkizý arqyly qol jetkiziledi.
Mysaly elimizde V Dúnıejúzilik kóshpendiler oıyndary ótedi.
Qazaqstannyń soltústik óńirlerinde ulttyq sport túrlerin damytýǵa erekshe nazar aýdarylady.
113 jańa sport nysanyn salý, 20-syn jańartý jáne jumys istep turǵan 6 sport nysanyn qaıta jaraqtandyrý jumysy jalǵasady.
Aýyldyq jerlerde shaǵyn bıýdjetti jazyqtyq sport qurylystaryna jáne modýldik úlgidegi az shyǵyndy, tez salynatyn sport keshenderine basymdyq beriledi.
Sondaı-aq, mınıstrlik jumys istep turǵan dene shynyqtyrý-saýyqtyrý jáne sport ǵımarattaryna túgendeý júrgizedi.
Bıznesti sporttyq ınfraqurylym salýǵa yntalandyrý jónindegi sharalar ázirlenbek. Mysaly, nysandy salý shyǵyndarynyń bir bóligin óteý.
Mınıstrdiń aıtýynsha, olımpıadalyq rezervti daıyndaý maqsatynda búkil el boıynsha jattyǵý ortalyqtary qurylady, onda jyl boıy jetekshi sportshylar da, basym sport túrleri boıynsha barlyq daryndy sportshylar da daıyndalady.
Bul ortalyqtarda jumys isteýge ǵylymı qyzmetkerler de tartylady. Al oblystardyń jáne respýblıkalyq mańyzy bar qalalardyń qurama komandalaryn daıyndaý úshin Qazaqstannyń barlyq óńirlerinde Astananyń úlgisimen olımpıadalyq jáne olımpıadalyq emes túrler boıynsha sportty damytý dırektsııasyn qurý josparlanyp otyr.
Jattyqtyrýshy-oqytýshylarǵa sportshylardyń joǵary nátıjesi jáne olardy sporttyq daıyndyqtyń kelesi kezeńine bergeni úshin yntalandyrý tólemderi engiziledi, bul jas talanttardyń alǵa jyljýyna kómektesedi, al mamandarǵa qosymsha motıvatsııa beredi.
Aldaǵy jazǵy jáne qysqy Olımpıadaǵa daıyndyq maqsatynda «Parıj-2024» jáne «Mılan-2026» baǵdarlamalary iske asady, onyń sheńberinde sportshylarǵa jan-jaqty qoldaý kórsetiledi.
«Sporttyq medıtsınany damytýǵa erekshe kóńil bólinedi. Elimizde sportshylardy ońaltýǵa jáne qalpyna keltirýge arnalǵan óńirlik dárigerlik-dene shynyqtyrý dıspanserleriniń bólimshelerin ashý boıynsha jumys jalǵasady. Sporttyq medıtsına ortalyǵyn kezeń-kezeńimen jańǵyrtý jáne ulttyq quramalardy medıtsınalyq-bıologııalyq qamtamasyz etý sapasyn jaqsartamyz. Jas sportshylar jaǵdaıynda olardyń jas, fızıologııalyq jáne psıhologııalyq erekshelikteri eskeriledi. 2025 jyly sport mekemeleri, komandalar quramy, jattyqtyrýshylar, tóreshiler jáne sporttyq is-sharalar týraly málimetter jınaýǵa arnalǵan e-sport ulttyq tsıfrlyq platformasyn engizý josparlanyp otyr» deıdi Ashat Oralov.
