Sportshylardyń Ánuran mátinin bilýi zań júzinde qamtamasyz etiledi - zań jobasy
ASTANA. 31 mamyr. QazAqparat - Búgin Májilis Tóraǵasy Nurlan Nyǵmatýlınniń tóraǵalyǵymen ótken palatanyń jalpy otyrysynda depýtattar «Qazaqstan Respýblıkasynyń memlekettik rámizderi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» zań jobasyn ekinshi oqylymda maquldady.
Zań jobasy boıynsha Májilis depýtattary memlekettik rámizderdi daıyndaý jáne paıdalaný kezindegi buzýshylyqtar úshin jaýapkershilikti kúsheıtýge qatysty túzetýler engizdi. Atap aıtqanda, memlekettik rámizderdi qorlaǵany úshin aıyppul mólsheri ulǵaıtyldy. Memlekettik rámizderdi sondaı-aq, olar belgilengen materıaldyq nysandardy daıyndaý kezinde ulttyq standarttardy buzǵany úshin ákimshilik jaýapkershilik belgilendi. Memlekettik rámizderdi paıdalaný tártibin buzǵany úshin jaýapkershilik qataıtyldy. Sport jáne dene shynyqtyrý jónindegi ýákiletti organnyń rólin arttyrý maqsatynda elimizdiń aýmaǵynda jáne shet elderde sporttyq is-sharalar ótkizý barysynda «Memlekettik rámizder týraly» zańnamany saqtaýdy qamtamasyz etý boıynsha quzyret bekitildi.
Sonymen qatar, depýtattar negizgi qujatqa ilespe zań jobasy bolyp tabylatyn «QR keıbir zańnamalyq aktilerge memlekettik rámizder máseleleri boıynsha ózgerister men tolyqtyrýlar engizý týraly» jobany da ekinshi oqylymda maquldady. Ekinshi oqylym barysynda atalmysh qujatqa depýtattar birqatar ózgerister engizdi.
«Atap aıtqanda, memlekettik rámizderdi qorlaǵany úshin jaýaptylyq qatańdatyldy. Sonymen qatar, QR memlekettik Týdy, memlekettik Eltańbany paıdalaný jáne memlekettik Ánurandy oryndaý tártibin buzǵany úshin jaýaptylyq kúsheıtiledi. Al el aýmaǵynda sporttyq is-sharalar jáne shet memleketterde ótetin halyqaralyq sporttyq is-sharalar ótkizý kezinde memlekettik rámizder týraly zańnamany saqtaý, sondaı-aq sportshylardyń memlekettik Ánurannyń mýzykalyq redaktsııasyn jáne mátinin bilýin qamtamasyz etý týraly ózgerister engizildi», - deıdi depýtat Maıra Aısına.
