«Sportshylar Olımpıada altynyn nege tisteıdi?» - respýblıkalyq basylymdarǵa sholý
***
Naryqtyq qoǵam árkimdi óz qarym-qabiletine qaraı beıimdemek. Qarym-qabilettiń eń úlkeni - tańdaǵan kásibińdi tereń meńgerý desek, úlkendi-kishili bızneste bireýdiń joly bolsa, bireýdiń baǵy janbaı jatady. Alaıda, kásiptiń qarapaıym túrine kóptegen adamdar mán bermeı jatamyz. Sonyń ishinde qus ónimderiniń biri - bódene jumyrtqasyn óndirý eleýsizdeý qalyp qoıǵan. Judyryqtaı qustyń jumyrtqasy men etiniń emdik qasıeti basym bola tura bul sharýa bizdiń elde nege kenjelep qalǵandyǵy jeke áńgime. Desek te, óz betinshe bódene ósirýge bel býǵan azamattar da joq emes. Solardyń biri - Shyǵys Qazaqstan oblysy, Borodýlıha aýdanyna qarasty «Aıdyn» sharýa qojalyǵynyń jetekshisi Ǵalym Súleımenov. Bul jaıynda tolyǵyraq «Egemen Qazaqstan» gazetiniń búgingi sanyndaǵy «Bódene baqqan bórkin aspanǵa atady» degen taqyryptaǵy maqaladan bile alasyzdar.
Memleket basshysy Nursultan Nazarbaev bıylǵy jylǵy Qazaqstan halqyna arnaǵan Joldaýynda sot jumysyn odan ári jetildirýge, ıaǵnı soǵan oraı sot jáne quqyq qorǵaý júıelerin jańǵyrtý mindetin alǵa qoıdy. Endi sýdıalar sot tóreligin tek zań men ar-ojdandy basshylyqqa ala otyryp shyǵarýǵa tıis. Mine, osy oraıda «Egemen Qazaqstan» gazeti bul keleli mindetterdiń oryndalý barysyna naqty kóz jetkizý maqsatynda Mańǵystaý oblystyq sot tóraǵasy Dosjan Ámirovti áńgime tartqan. «Jańǵyrtýdyń maqsaty» degen taqyryppen berilgen suhbat barysynda D.Ámirov: «Eń negizgi ózgeristerdiń biri - budan bylaı kassatsııalyq alqa májilisterin oblystyq sottyń tóraǵasy tikeleı ózi júrgizedi. Bul sot bıligin joǵary deńgeıde ári sapaly júzege asyrýǵa yqpal etetin tetikterdiń eń bastysy», - deıdi.
***
Ótken jyly Teńiz ken ornynyń mańynda 4 baldyq jer silkinisi oryn aldy. Jer dúmpýin sezingen TShO qyzmetkerlerinen basqa halyq bul jańalyqty buqaralyq aqparat quraldarynan bilip, alańdap-aq qalyp edi. Munaı-gaz keń kólemde ıgerilip jatqan aımaqta tehnogendik áreketterdiń áseri joǵarylap keletini shyndyq, bul jer qoınaýynyń jaǵdaıyn ózgeriske túsiretini de belgili. Tepe-teńdiktiń buzylýy saldarynan bolatyn tehnogendik apattar «qara altyndy» Atyraýdy aınalyp óte ala ma? Ras, kúni búginge deıin oshaǵy Atyraý jerinde ornalasqan jer silkinisteri tirkelgen joq. Biraq bul munaıly mekenniń seısmıkalyq qaýipsiz aımaq sanatynda bolýymen baılanysty emes. Aımaqqa seısmologııalyq zertteýlerdiń júrgizilmegendiginde bolyp otyr. Elimizdiń munaıly aımaqtaryn tehnogendi apat kútip tur ma? Bul týraly «Alash aınasy» gazetiniń búgingi sanyndaǵy «Kaspııge tehnogendi jer silkinisinen qaýip bar ma?» degen maqaladan bile alasyzdar.
«Búgingi kúni otbasyn qurǵandardyń basym kópshiliginde bala bolmaı, erli-zaıyptylardyń dárigerden-dárigerge qaralap, dińkesi quryp otyrǵan oqıǵalar el arasynda kóptep kezdesýde. Osy salanyń dáriger mamandary munyń barlyǵyn áıelder men erkekterdiń arasynda bedeýlik dertiniń ýshyǵyp ketkendigimen baılanystyryp otyr», - dep jazady «Alash aınasy» gazeti. Osy rette basylym er-azamattardyń kindikten tómen aýrýlarynyń qanshalyqty deńgeıde ekendigin bilý maqsatynda elimizdiń ýrolog-androlog mamandarymen pikirlesken. Jarııalym «Beleń alǵan belsizdik máselesin sheshýge 3,8 mıllıard teńge qajet» degen taqyryppen jarııa etildi.
***
«Tórt jylda bir aınalyp kelip otyratyn jazǵy Olımpıada oıyndarynyń tasqa basylmaǵan, altynǵa qoly jetken chempıonnyń odan aınalyp óte almaıtyn óz jarǵysy bar. Ol - jeńis tuǵyrynda altyn medaldyń dámin seziný. Bizdiń bul oıymyzǵa «altyn - temir, onyń dámi bolýshy ma edi?!» dep qarsylyq tanytatyndar da bar shyǵar», - dep jazady «Aıqyn» gazeti búgingi sanyndaǵy «Sportshylar Olımpıada altynyn nege tisteıdi?» degen taqyryptaǵy maqalasynda. Basylymnyń atap ótýinshe, bastapqyda medal taza altynnan quıylǵan. Al keıin kele qundy metaldy únemdeý úshin kúmis qosqan. Ýaqyt óte kele altyn medaldyń quramy asa taza emes ekendigi syrt kózge baıqala bastaǵan. Muny eń birinshi kezekte jeńimpazdardyń ózi tispen tisteý arqyly synap kórgen.
