Sportshylar Memlekettik Ánurandy bilýge mindetteledi - Zań jobasy
ASTANA. QazAqparat - Jańa redaktsııadaǵy «Dene shynyqtyrý jáne sport týraly» zań jobasyna sáıkes, sportshylarǵa Qazaqstan Respýblıkasynyń Memlekettik Ánuranyn bilý mindetteledi. Bul týraly Májilistiń jalpy otyrysynda málim boldy.
QR Sport jáne dene shynyqtyrý agenttiginiń tóraǵasy Tastanbek Esentaevtyń aıtýynsha, dene shynyqtyrý jáne sport týraly zańnamany jańa redaktsııada daıyndaýǵa negizinen qazirgi zamanǵy úrdisterdi, sport salasyna qoıylatyn talaptardy eskere otyryp, jetildirý maqsatynan týyndaǵan. Bul rette agenttik álemdik tájirıbeni zerdelep, ásirese buqaralyq sportty damytý máselelerin retteýdiń basty qaǵıdattaryna nazar aýdarǵan. Osyǵan oraı, zań jobasynyń negizgi maqsaty dene shynyqtyrý men sporttyń turaqty júıesin jáne osy salada tıimdi memlekettik basqarýdy qurýdy qarastyrady. Budan bólek, memlekettik jáne qoǵamdyq ınstıtýttardyń ózara birlesken is-qımyldaryn, dopıngtik quraldardy paıdalanýǵa qarsy áreket jáne dene shynyqtyrý men sporttyq is-sharalardy uıymdastyrý jáne ótkizý tártibin júıelendirý boıynsha quqyqtyq tetikterdi belgileý qarastyrylady. Sonymen qatar, zań jobasynda dene shynyqtyrý men sport salasyndaǵy ýákiletti organnyń quzyreti naqtylanady. Sport federatsııalaryn akkredıtteıtin ınstıtýt engizilip, materıaldyq kómekti alý quqyǵy bar adamdardyń - Paralımpıadalyq jáne Sýrdlımpıadalyq oıyndardyń chempıony atanǵan múgedek sportshylardyń tizimi keńeıtildi.
Budan bólek, zań jobasy sportshylarǵa QR Memlekettik Ánuranyn bilýdi mindetteıdi. «Qazaqstan qurama komandalaryn iri sporttyq sharalarǵa daıyndaý máseleleri boıynsha uıymdastyrý komıtetin qurýǵa qatysty Úkimettiń ókilettigi keńeıip otyr», - deıdi T. Esentaev.
Eske sala keteıik, jańa redaktsııadaǵy zań jobasy búgingi palatanyń jalpy otyrysynda birinshi oqylymda maquldandy.
