Sportshylar dári-dármek qabyldaǵanda óte muqııat bolýy kerek - bapker
NUR-SULTAN. QazAqparat – QR konkımen júgirý sportynan memlekettik jattyqtyrýshy Kenjesh Sársekenova dopıngpen ustalǵan sportshylardyń jazasyn kúsheıtetin zańǵa qatysty pikir bildirdi. Onyń aıtýynsha, baıqamaı shalys basqan bir ǵana qadam sportshynyń keleshegine qater tóndiredi, dep habarlaıdy QazAqparat tilshisi.
«Sportshy taza bolýy kerek. Búkil dúnıe júzinde sportshylardyń bári dopıngten taza bolyp, jarysta ózara myqtyny anyqtasa – naǵyz sport degen sol. Bizdiń býynnyń sportshylary - taza óz kúshimen, eńbegimen kóterilgen azamattar. Jas kezimizde eshqandaı vıtamın berilmeıtin. Oılap qarasańyz, sportshy dopıng qoldanyp, jeńiske jetip jatsa, onyń aqyry dopıng qoldanǵany anyqtalmaı ketse de abyroı emes. Sol úshin sportshynyń ary taza bolýy tıis», - deıdi Kenjesh Sársekenova QazAqparat tilshisine.
Konkımen júgirý sportynan jattyqtyrýshy óz basynan ótken jaǵdaı týraly baıandap berdi.
«1993 jyly Nıý-Iorkke jarysqa bardym. Ol kezde dopıng máselesi búgingideı ótkir emes-tin. Sol joly sýyq tıip, aýyryp qaldym. Úlken sýpermarketten baryp, ystyq shyǵaratyn, murynǵa tamyzatyn dári aldym. Sportshylardy dopıngke tekserý barysynda mamandar meniń jótelip, ózimdi jaısyz sezinip turǵanymdy kórdi. «Qandaı da bir dári qabyldadyńyz ba?» dep surady. Sol kezde dári ishkenimdi aıtyp, dári-dármektiń qoraptaryn kórsettim. Qorapty kórgennen keıin mamandar tynyshtaldy. Sóıtsem, dáriniń quramynda daý týǵyzatyn komponentter bar eken. ıAǵnı, sportshylarǵa endi óte muqııat bolý kerek. Sportshylar da adam. Temirden jaralǵan joq. Dese de, aýyryp qalsa, birden dáriger men jattyqtyrýshysyna habar berýi kerek. Bárin kelisip otyrǵan abzal», - deıdi ol.
Jattyqtyrýshynyń aıtýynsha, Dopıngke qarsy ulttyq ortalyq sportshylar men bapkerlerdiń bárine qandaı dárini ishýge bolatynyn, qandaıyn ishýge bolmaıtyny kórsetilgen tizim jiberip otyrady.
«Dáriniń quramyna 00,1 gram meldonıı bolsa, onyń ózi sportshynyń keleshegi úshin qaýipti degen sóz. Oblys-oblystaǵy barlyq bapker sol tizim boıynsha jumys júrgizedi. Qadaǵalamasa bolmaıdy. Baıqamaı shalys basqan bir ǵana qadam sportshynyń keleshegine qater tóndirýi múmkin», - deıdi bapker.
Aıta ketsek, Kenjesh Sarsekenova 1972 jyly týǵan. Jasóspirim qyzdar arasyndaǵy Qazaqstannyń, Álemniń eki márte chempıony, 1994 jyly Lıllehammerde (Norvegııa), 1994 jyly Nagano (Japonııa) qysqy Olımpııa oıyndaryna qatysýshy, qysqy Azııa oıyndaryna (1999, Ońtústik Koreıa) qatysyp, 1500 m-ge syrǵanaýdan 8-shi, kópsaıysta 9-shy orynǵa ıe bolǵan. Álem kýbogynyń kezeńderine, Norvegııa, Gollandııa, Germanııada ótken halyqaralyq týrnırlerge qatysqan. Konkıde júgirýden sport sheberi, eki dúrkin qysqy Olımpıada qatysýshysy, 7 dúrkin QR chempıony.
Eske sala ketsek, búgin Prezıdent Qasym-Jomart Toqaev «QR Sport jáne dene shynyqtyrý týraly keıbir zańnamalyq aktilerge ózgertýler men tolyqtyrýlar engizý týraly» zańǵa qol qoıǵan bolatyn. Zań dopıngke qarsy erejelerdi buzǵandardyń jaýapkershiligin qatańdatýǵa, Ulttyq dopıngke qarsy uıymnyń mártebesin kúsheıtýge baǵyttalǵan.
