Sportshy, bıshi, báıgeshi – Qostanaıda ámbebap polıtseı jumys isteıdi
QOSTANAI. QazAqparat – Quqyq qorǵaý salasynda er azamattarmen qatar qoǵam qaýipsizdigin qamtamasyz etý jolynda ter tógip júrgen názik jandar da barshylyq. Solardyń biri – Qostanaı oblystyq polıtsııa departamentiniń Aqparattandyrý jáne baılanys basqarmasynyń ınspektory Ásel Muratbek. Ol «QazAqparat» HAA tilshisine qyzmetiniń qyzyǵy men qıyndyǵy týraly aıtyp berdi.
Ásel Júsipqyzy 1997 jyly Naýyrzym aýdanynda týǵan. 2015 jyly M.Esbolatov atyndaǵy QR ІІM Almaty akademııasyna oqýǵa túsedi. Munda aqparattyq júıeler mamandyǵyn ıgerip shyqty.
«Bolashaq mamandyǵymdy bala kezimde anyqtadym dese de bolady. Bastaýysh synypta «Kim bolǵym keledi?» degen taqyrypta bárimiz shyǵarma jazdyq qoı. Sol kezden-aq polıtsııa mamandyǵy qyzyqtyratyn. Otbasymyzben tártip saqshylary týraly shytyrman oqıǵaly kórkem fılmderdi kóp kórdik. Mine, osylaısha arman jetegine erip kettim», - deıdi jas polıtseı.
Ásel Muratbektiń quqyq qorǵaý salasyna kelýiniń basty sebebi – sport. 2008 jylǵy Qytaıdyń Beıjiń qalasynda ótken jazǵy Olımpıada oıyndarynda el sportshylaryna jankúıer boldy.
«Sol dodada Qazaqstanǵa eńbek sińirgen sport sheberi Elena Shalygına «qola» júldeger atandy. Osy sátten bastap, men kúrespen aınalysýǵa bel býdym. 2008 jyly kúres zalynyń esigin ashtym. Bapkerdiń jattyqtyrýynyń arqasynda sportta joǵary jetistikke jete bastadym. Bala kúngi armanym men sporttaǵy kórsetkishim mamandyǵyma jeteledi. Almatydaǵy QR ІІM akademııasyna túskende qyzdar vzvodynyń komandıri etip taǵaıyndady. Keıin kishi serjant ataǵyn aldym», - dep jalǵady Ásel Júsipqyzy.
Sportshy qyz oqý ornynyń atynan respýblıkalyq, halyqaralyq jarystarǵa qatysyp júrdi. 2013 jyly erkin kúresten sport sheberligin oryndady. Ámbebap Ásel parashıýtten sekirý jáne «Qyz qýý» sportynan joǵarǵy jetistikterge jetti. Sonymen qatar ol kórkem sóz oqý men bı saıystarynyń birneshe márte júldegeri.
«2019 jyly Qostanaı oblysy polıtsııa departamentiniń Aqparattandyrý jáne baılanys basqarmasyna jumysqa turdym. Bir-eki jyldaǵy eńbegim elenip, QR Іshki Іster mınıstriniń qolynan marapat aldym. Degenmen polıtseıge eń jaqsy joǵary baǵany halyq beredi», - dep túıdi Ásel Muratbek.
Urpaǵyn kez kelgen qaterden qorǵaı bilgen analarymyzdyń sarqylmas sarqytyndaı bolyp, elimizdiń bolashaǵy úshin eńbek etip kele jatqan ámbebap polıtseıdiń alar asýlary áli alda. Buǵan bek sendik!
