Sportshylarǵa sapar shyǵyndaryn óteýge 2000 dollar kóleminde grant beriledi
ASTANA. KAZINFORM — Halyqaralyq Olımpıada komıteti (HOK) men Airbnb sportshylarǵa arnalǵan Airbnb Athlete Travel Grant baǵdarlamasyna ótinim qabyldaý bastalǵanyn jarııalady.
Baǵdarlama aıasynda sportshylar jattyǵý jıyndary men jarystarǵa baılanysty saparlar kezinde turý shyǵyndaryn óteý úshin 2000 AQSh dollary kóleminde grant ala alady.
Jalpy álemniń túkpir-túkpirinen 1000 sportshyǵa qoldaý kórsetiledi. Grantty alǵan kúnnen bastap 12 aı ishinde Airbnb platformasy arqyly turǵyn úıdi brondaý úshin paıdalanýǵa bolady. Baǵdarlamanyń maqsaty — iri halyqaralyq jarystarǵa daıyndyq kezeńinde sportshylardyń turýǵa jumsaıtyn qarjylyq shyǵynyn azaıtý.
Baǵdarlamaǵa Halyqaralyq Olımpıada komıteti nemese Halyqaralyq Paralımpıada komıteti moıyndaǵan halyqaralyq sport federatsııalary uıymdastyratyn, 2028 jylǵy Olımpıada jáne Paralımpıada oıyndary men Frantsýz Alpilerinde ótetin 2030 jylǵy qysqy Olımpıada jáne Paralımpıada oıyndary baǵdarlamasyna engizilgen olımpıadalyq jáne paralımpıadalyq sport túrleri boıynsha óner kórsetetin sportshylar ótinim bere alady.
Úmitkerler Olımpıada hartııasyn, dopıngke qarsy erejelerdi nemese sporttyq básekeniń adaldyǵyn qamtamasyz etýge qatysty ózge de normalardy buzǵany úshin dıskvalıfıkatsııada nemese ýaqytsha shettetilýde bolmaýy tıis. Sonymen qatar qatysýshylar grantty alý úshin Airbnb platformasynda akkaýnt ashýǵa qoıylatyn talaptarǵa saı bolýy qajet. Platforma paıdalanýshysynyń jasy keminde 18-de bolýy tıis.
Baǵdarlamaǵa qatysý úshin sportshylar Athlete365 platformasynda jeke basyn rastaý rásiminen ótip, ótinim toltyrýy qajet. Ótinimde sońǵy úsh jarystaǵy nátıjelerin, aldaǵy úsh josparlanǵan jarysyn kórsetýi, sondaı-aq granttyń daıyndyqqa qalaı kómektesetinin jáne ne sebepti dál ózi bul qoldaýǵa laıyq ekenin túsindirýi kerek.
Grant ıegerleri konkýrstyq irikteý qorytyndysy boıynsha anyqtalady. Ótinimderdi qaraý kezinde sporttyq nátıjeler, sportshynyń jeke tarıhy, alǵa qoıǵan maqsattary, qarjylyq qoldaýǵa degen qajettiligi, aldaǵy Olımpıada oıyndaryna qatysý múmkindigi, sondaı-aq, granttyń jarystarǵa daıyndyqqa qanshalyqty yqpal etetini eskeriledi.
Ótinim qabyldaý 2026 jyldyń 7 shildesine deıin, AQSh-tyń Tynyq muhıty jaǵalaýy ýaqytymen 23:59–ǵa deıin, Athlete365 platformasynda jalǵasady
