Sportshylarǵa komandada óziniń dinı nanymdaryn ashyq kórsetýge tyıym salynady

  ASTANA. KAZINFORM — Týrızm jáne sport mınıstriniń buıryǵymen Qazaqstan Respýblıkasynyń sporttyq ádebi bekitildi. Buıryq 8 shildede alǵashqy resmı jarııalanyp, endi kúntizbelik on kún ótken soń, ıaǵnı 19 shildede qoldanysqa engiziledi.

Sporttyq ádep «Dene shynyqtyrý jáne sport týraly» zańnyń 7-baby 65-2) tarmaqshasyna, jalpy qabyldanǵan moraldyq-etıkalyq normalarǵa sáıkes ázirlengen jáne sportshylardyń, jattyqtyrýshylardyń, jattyqtyrýshy-oqytýshylar men sport tóreshileriniń minez-qulyǵynyń negizgi erejelerin belgileıdi.

Sportshylar, jattyqtyrýshylar, jattyqtyrýshy-oqytýshylar jáne sport tóreshileri:

1) qoǵamǵa jat minez-qulyq jaǵdaılaryna, onyń ishinde qoǵamdyq oryndarda adamnyń qadir-qasıetin jáne qoǵamdyq ımandylyqty qorlaıtyn alkogoldik, esirtkilik nemese ýyt-qumarlyq mas kúıinde bolýyna jol bermeıdi;

2) adal oıyn jáne adal sporttyq jarys qaǵıdattaryn saqtaıdy;

3) ulttyq komandalardyń ókilderine, qarsylastaryna, kórermenderge jáne sporttyq jarystardy uıymdastyrýshylarǵa sporttyq is-sharalarda qurmetpen qaraıdy;

4) basqa sportshylardyń, volonterlerdiń quqyqtary men qadir-qasıetin qurmetteıdi, sonymen qatar olarǵa qatysty kemsitýshilikke jol bermeıdi jáne sporttyq is-sharalar men marapattaý rásimderi ótetin jerlerde saıası sherýlerge qatyspaıdy;

5) óziniń sporttyq bedeline zııan keltirýi múmkin daýly jaǵdaılardan aýlaq bolady;

6) Qazaqstan Respýblıkasynyń Memlekettik Eltańbasyna, Qazaqstan Respýblıkasynyń Memlekettik Týyna, Qazaqstan Respýblıkasynyń Memlekettik Gımnine, sondaı-aq sporttyq jarystarǵa qatysýshy elderdiń memlekettik rámizderine uqypty jáne qurmetpen qaraıdy;

7) Qazaqstan Respýblıkasy Memlekettik Gımniniń mýzykalyq redaktsııasyn, mátinin biledi;

8) Qazaqstan Respýblıkasynyń Memlekettik Gımnin oryndaý kezinde Sporttyq ádeptiń etıkalyq normalaryn ustanady;

9) tóreshi sheshimine qurmetpen qaraıdy jáne kópshilik daýlardan aýlaq bolady;

10) sporttyq jarystardyń qorytyndysy boıynsha alynǵan sporttyq marapattarǵa (kýboktarǵa, medaldarǵa, gramotalarǵa jáne dıplomdarǵa) uqypty jáne qurmetpen qaraıdy;

11) sporttyq jarystarda marapattaý rásimine qatysady;

12) sporttyq jarystarda, marapattaý rásimi kezinde, resmı sýretke túsirý jáne mass-medıamen jumys isteý kezinde sport túri boıynsha Qazaqstan Respýblıkasynyń ulttyq komandasynyń nemese óziniń sport klýbynyń sporttyq kostıýmderinde bolady;

13) sporttyq is-sharany jarııalaıtyn mass-medıa ókilderiniń jumysyna qurmetpen qaraıdy;

14) basqa sportshylarǵa elikteý úshin úlgi retinde óner kórsetedi;

15) sporttyq jarystardyń erejesin (reglamentin) saqtaıdy.

Sportshylarǵa, jattyqtyrýshylarǵa, jattyqtyrýshy-oqytýshylarǵa jáne sport tóreshilerine mynadaı tyıymdar salynady:

— oqý-jattyǵý protsesine qatysy bar aqparatty jarııa etýge;

— sporttyq is-shara kezinde nemese odan keıin bylapyt sózder men normatıvtik emes leksıkany, qorlaý qımyldaryn paıdalanýǵa;

— sporttyq jarystardyń nemese oqý-jattyǵý jıyndarynyń barysyn sebepsiz buzatyn nemese aralasatyn ne Qazaqstan Respýblıkasynyń bedeline nemese ımıdjine teris áser etetin kez kelgen áreket nemese minez-qulyqqa;

— ym tili men mımıkany qosa alǵanda, jazbasha nemese aýyzsha túrde sporttyq is-sharany ótkizý aldynda, ótkizý kezinde jáne (nemese) ótkizgennen keıin qandaı da bir adamǵa qaýip tóndirýge;

— komandada óziniń dinı nanymdaryn ashyq kórsetýge jáne basqa adamdardy dinı birlestikterdiń qyzmetine qatysýǵa jáne mıssıonerlik qyzmetpen aınalysýǵa májbúr etýge.