Sportshylarǵa arnalǵan aı saıynǵy tólemderdiń biryńǵaı júıesi engizildi

ASTANA. KAZINFORM —  «Dene shynyqtyrý jáne sport týraly» zań qabyldanǵannan keıin, sport túrleri boıynsha Qazaqstan Respýblıkasy ulttyq komandalarynyń quramyna kiretin sportshylarǵa, olardyń jattyqtyrýshylaryna aı saıynǵy aqsha qarajaty tólemderiniń mólsherin bekitý týraly buıryq kúshine endi.

— Aı saıynǵy tólem mólsheri 5-ten 250 aılyq eseptik kórsetkishke (AEK) deıingi aralyqta belgilengen. Jańa júıe ınflıatsııany eskere otyryp, tólem somasyn jyl saıyn qaıta qaraýdy qajet etpeı, qarjylandyrý kólemin avtomatty túrde túzetýge múmkindik beredi. Aıta ketý kerek, buǵan deıin bul tólemder ár óńirde ártúrli bolǵan.

Jańa júıe boıynsha tólemder halyqaralyq jáne respýblıkalyq jarystarda joǵary nátıje kórsetken sportshylar men olardyń jattyqtyrýshylaryna, sporttyq mansabyn jalǵastyrý shartymen, kelesi jarysqa deıin jergilikti atqarýshy organdar arqyly júzege asyrylady, — delingen Týrızm jáne sport mınıstrliginiń habarlamasynda.

Atalǵan buıryq oblystardyń, respýblıkalyq mańyzy bar qalalardyń jáne astananyń ákimdikterimen, sondaı-aq Qazaqstan Respýblıkasynyń Qarjy mınıstrligimen kelisilgen.

Jańa tásil joǵary deńgeıdegi sportshylar men olardyń jattyqtyrýshylaryn qoldaýda ashyqtyqty, turaqtylyqty jáne teń múmkindikterdi qamtamasyz etedi.

Aıta ketelik Úkimet eń tómengi jalaqy mólsherin arttyrý ıdeıasynan bas tartqan edi.